GALICIA | POLÍTICA
Alexandra Fernández: "Canto máis teñen que subir os prezos para que o PP actúe?"
SANTIAGO DE COMPOSTELA | “Canto máis teñen que subir os prezos do alugueiro para que digamos basta?
Canto máis teñen que seguir subindo para que este goberno asuma isto como un
problema de extrema urxencia? Cal é o tope do PP para intervir?”. Con esta
rotundidade defendeu a portavoz de Vivenda, Alexandra Fernández, unha moción en
pleno parlamentario para incorporar a redución dos prezos do alugueiro libre
como obxectivo estratéxico dentro do novo Plan de Vivenda 2021-2025.
Na
iniciativa do BNG inclúese a elaboración dun Plan galego para un alugueiro
accesible garantido que permita tanto rebaixar os prezos do alugueiro no
mercado libre, como incrementar substancialmente a porcentaxe de vivenda
pública en réxime de aluguer respecto ao total do parque construído, así como
aumentar as liñas de axudas directas a persoas inquilinas, fundamentalmente as
destinadas aos colectivos máis vulnerables ou actualmente máis desprotexidos.
De
igual xeito, o Bloque propón a elaboración por parte do Observatorio da Vivenda
dun informe anual de estudo e diagnóstico, pormenorizado e territorializado,
das variacións dos prezos da vivenda libre en aluguer e o seu impacto na
accesibilidade.
Na
súa intervención, Fernández advertiu que na actualidade hai 30.000 fogares que
destinan máis dun 30% das súas rendas ao pago do alugueiro e 10.000 que dedican
a este mesmo fin máis dun 50% da renda. “Se cabe, a situación é máis dramática
naquelas familias nas que hai nenos ou naqueles fogares onde, directamente non
son capaces de pagar”, salientou, para engadir a continuación que en 2019 xa
eran 1.800 fogares os que acabaron sufrindo un despexo por impago do aluguer.
Neste
sentido lembrou que a Xunta ten as competencias en materia de vivenda e
instouna a actuar porque “un goberno decente non pode permitir que continúe
esta escalada de prezos”. “A estas alturas deberiamos ter xa claro que tomar
medidas hoxe, mudar o modelo, é tamén evitar as crises do mañá”, subliñou para pedir
o apoio para unha iniciativa que pretende “fixar como obxectivo común pórlle
límite a esta burbulla”.
A portavoz
de Vivenda afeou o modelo do PP e recordou que o 99% das vivendas en alugueiro
de Galiza son vivendas privadas, “un monopolio que permite ao sector privado
seguir subindo os prezos ata espremernos as rendas porque non hai alternativa”,
recalcou logo de recordar que o parque de vivendas públicas non chega
actualmente ás 4.000 vivendas. Pese a apuntar medidas máis ambiciosas como a
mobilización de vivenda baleira, o incremento das axudas ao alugueiro ou o
control de prezos en zonas concretas como as que sofren maior presión turística,
presentou as recollidas na moción como unha proposta “de mínimos” para frear a
escalada de prezos.
Fernández
recriminou o veto do PP á iniciativa e recalcou que “vostedes non son
conscientes da tensión e da dor que está creando na sociedade o aumento dos
prezos do alugueiro”. “Dicir que están fartos de que traiamos este tema aquí é
de vergonza”, sentenciou. Departamento de comunicación