CASO ENCE
Fernández Lores participará na mesa convocada polo Ministerio de Transición Ecolóxica para o traslado de Ence
A xuntanza terá lugar o mércores no propio Ministerio
PONTEVEDRA | O alcalde de Pontevedra, Miguel Anxo Fernández Lores, acompañado polo
director de urbanismo, Xosé Manuel Tato, asisitirá o vindeiro mércores, ás 16:00 horas, á mesa de traballo convocada polo Minsiterio para
la Transición Ecológica y el Reto Demográfico, na que se abordará o
traslado de Ence. Fíxoo público hoxe a portavoz do Goberno
municipal, Anabel Gulías, quen asegurou que a intención do Concello de
Pontevedra é “reclamar formalmente a quen ten competencias no asunto,
polo tanto o Ministerio e a Xunta, que tomen unha determinación sobre o
traslado efectivo”.
Anabel Gulías asegurou que o goberno municipal leva intención de
“escoitar con respecto a todas as partes pero mantendo firme a nosa
posición de fai máis de vinte anos, que pasa polo traslado e a
recuperación dos terreos para os veciños e as veciñas de Pontevedra”. A
protavoz cualificou o traslado da fábrica como “unha necesidade
imperiosa” e fixo referencia a tres motivos básicos. En primeiro lugar,
citou a “calidade democrática” en relación “á concesión dunha prórroga
fraudulenta concedida a Ence en tempo de desconto”, na que tamén menciou
“unha cuestión de equidade, porque esta factoría non pode ter un
tratamento diferenciado do resto de empresas e industrias da nosa
comarca, polo tanto por calidade democrática é necesario aclarar esta
cuestión”.
En segundo lugar, situou a recuperación dos terreos públicos e
lembrou que “o Concello de Pontevedra leva anos loitando non só polos
terreos de Ence-Elnosa senón tamén por outros terreos que deben ser
devoltos á cidadanía pontevedresa para o seu desfrute”. E por último,
asegurou que se precisa “unha garantía de seguridade na contorna do noso
Concello” e lembrou que “fai uns días asistiamos a un novo susto cando a
propia Ence advertía dos níveis de mercurio que estaban atopando na
descontaminación e no desmantelamento de Elnosa.” Sobre o punto da
seguridade, incidiu en que “é necesario aclarar esta cuestión” e lembrou
que “seguimos agardando as explicacións da Xunta de Galicia desas
declaracións do CEO da empresa nas que falaba dun susto maiúsculo”.
Xuntanza co Secretario de Estado de Medio Ambiente
Ao día seguinte, o xoves, Lores, como
presidente das Cidades que Camiñan, manterá unha xuntanza co Secretario
de Estado de Medio Ambiente, Hugo Morán. O obxectivo desta reunión é
intercambiar puntos de vista sobre determinados aspectos da Ley de
Cambio Climático y Transición Energética, nomeadamente en cuestións que
atinxen á mobildiade.
O principal aspecto de preocupación para o Concello de Pontevedra,
segundo avanzou Anabel Gulías, son as condicións das zonas de baixas
emisións “nas que se establece o foco máis en cuestións relacionadas co
tipo de vehículos que poderán acceder a esta zonas que con cuestións
estruturais”. Neste sentido, asegurou que “mantemos certa preocupación
porque cremos que esquece os criterios que foron básicos no modelo
urbano de Pontevdra, como a restrición de todos os vehículos que non
fosen necesarios para que a cidade funcionase, independentemente de sen
son eléctricos ou teñen outras etiquetas”. A este respecto, indicou é
necesario atender a parámetros de redución de tráficos innecesarios “se
se quere tomar en serio este tipo de cuestións e que a loita contra o
cambio climático sexa efectiva”. Departamento de comunicación