GALICIA | POLÍTICA
Gonzalo Caballero: "O PP erra cando vai en plan so ante o perigo"
SANTIAGO DE COMPOSTELA | O portavoz do Grupo Parlamentario Socialista, Gonzalo Caballero, puxo
hoxe ao PP ante o espello do fracaso da súa estratexia de presentarse
“sós ante o perigo”. “Erraron coa reforma da Lei de Saúde, que fixeron
sós ante o perigo ata que llela parou o Tribunal Constitucional por
vulnerar dereitos fundamentais, e errarán se se presentan sós ante o
perigo da crise sen buscar a concertación á hora de acadar financiamento
de Europa”, resumiu.
O líder dos socialistas galegos
interveu na comparecencia do conselleiro de Economía diante da Comisión
de Reactivación do Parlamento para ofrecerlle a “man tendida” dos
socialistas galegos para rectificar o seu “suspenso claro” en
“estratexia, formas e modelo de país” cun balance claramente negativo na
xestión económica da crise ata o momento.
O secretario xeral do PSdeG reclamou unha “orientación seria,
profunda e rigorosa” que poña por diante a xeración de emprego á hora de
respaldar os proxectos públicos ou de carácter público – privado de
referencia para Galicia.
Logo de meses de “política de
parcheo”, nos que demostraron que “carecen de visión para o país”,
limitáronse -dixo- a “xogar a facer propaganda en lugar de buscar
solución”, o que é unha evidencia aos ollos de “todo o tecido económico,
que sabe que non fixeron ningunha aposta decisiva”. Preguntou así “para
que serviu o Consello da Xunta no que aprobaron 354 proxectos sen
competencias para impulsar ningún investimento, orientación ou
convocatorias” para desenvolvelos.
Gonzalo Caballero
apostou por unha nova política de “acordo e concertación” dende o
goberno galego para superar meses de desleixo nos que se limitaron a
“coordinar xornadas e recolectar power points para mandarlle un excel ao
goberno de España no que non se identifican as apostas do goberno
galego”.
Reclamou unha nova política de cogobernanza
“non só entre a Xunta e o goberno de España”, senón que o goberno galego
debe adoptar “un novo estilo de cooperación e diálogo para a xestión da
crise”. O líder socialista requiriu a participación “do conxunto da
sociedade, os axentes económicos e sociais e tamén os grupos
parlamentarios”, e afeoulle que “ata agora só teñen ofrecido unha
sucesión de comparecencias publicitarias sen darnos uns datos mínimos
para argumentar”.
“Fagan os deberes"
Gonzalo Caballero sinalou que “os
proxectos relevantes para a reactivación económica de Galicia terán o
respaldo e o aval do PSdeG diante do reto de conseguir fondos e acadar a
capacidade de
executalos”, e garantiu que “toda a Galicia emprendedora que presente proxectos positivos de futuro contará co noso respaldo”.
O
responsable socialista despregou hoxe unha “crítica construtiva” para
pedirlle ao goberno galego que “fagan os deberes” que permitan
desenvolver o país a nivel económico. Puxo como exemplo o compromiso do
ministro de Transportes, que anunciou un investimento para Galicia “moi
por riba do PIB e a poboación de Galicia”, con proxectos coma o AVE, a
rebaixa da AP-9, as intermodais, a saída sur, a conexión ferroviaria con
Punta Langosteira e a electrificación do tren de Lugo. Departamento de comunicación