GALICIA | DÍA DO LIBRO
Pontón propón duplicar o investimento destinado ao libro até 5,5 millóns
VIGO | Nada mellor
que unha librería para celebrar o Día
internacional do libro, e a portavoz nacional, Ana Pontón, exemplificou
cunha visita á librería Cartabón en Vigo,
-case 30 anos en activo-, a importancia destes establecementos dentro da cadea
do sector editorial, “auténticos lugares
de resistencia cultural”, salientou, en relación ás pequenas e medianas
librerías.
De Cartabón saíu Pontón con varios libros
baixo o brazo, -entre eles Os Bolechas
e Elmer, celebérrimos exemplos de
literatura infantil-, antes de deixar as propostas do BNG para a promoción da lectura
e do libro en galego, baixo mínimos tras doce anos de Goberno Feixóo cunha
redución drástica no investimento público: de 5,5 millóns de euros recollidos
nos orzamentos de 2009 a 2,3 millóns computados nas contas públicas de 2021, “un
recortazo do 58%”.
“Hai que mudar esa política de demolición
posta en práctica por Feixóo desde a súa chegada ao Goberno da Xunta, convertido
nunha especie de terminator do sector
do libro cando debería ser o seu principal valedor”, denunciou. E para iso, a
proposta do BNG é duplicar os recursos destinados ao sector de tal xeito que,
cando menos, se recupere a cifra de 5,5 miilóns que xa se investía fai doce anos,
perfectamente asumible nuns orzamentos
que suman 11.600 millóns.
Pontón recalcou que o sector do libro
non só xera cultura “senón que tamén é un sector económico importante que crea
riqueza e postos de traballo”, ademais de dar “visibilidade” á lingua e cultura
propia. De feito, o sector cultural no seu conxunto aporta o 2,5% do PIB e o 3%
do emprego con 34.000 postos de traballo, e sitúa Galiza como a quinta
comunidade con máis emprego neste sector.
Neste sentido, o Bloque considera
urxente cambiar a dinámica de recortes imposta polo Goberno do PP, que os datos
reflexan con claridade porque caen os fondos en todos os programas relacionados coa promoción da lectura e do libro en galego
se comparamos 2009 con 2021: adquisición de libros en galego (-80%), edición de
libro en galego (-82%), promoción da lectura e do libro (-85%) ou apoio á
promoción e edición de libro en galego (-60%). Recortes que teñen
consecuencias: a edición e libros en galego caeu en
picado, de 2.544 en 2010 a 1.200 en 2019. “O que supón un empobrecemento
cultural, pero que tamén ten un custe en termos económicos e sociais”,
recalcou.
Pontón tamén demandou a posta en marcha dun Plan de promoción do libro
galego e da lectura, como prevé a propia lei, pero que non se ten
desenvolvido nunca. “Unha
sociedade que non lee é unha sociedade máis manipulable, unha sociedade menos
libre, unha sociedade que non progresa.
Por iso, o BNG considera clave que as Administracións públicas sexan un
motor de promoción do libro e da lectura, para ter unha sociedade máis
democrática e crítica, unha cidadanía máis informada, máis culta e máis libre”,
concluíu, tras visitar a librería Cartabón en
homenaxe ao papel destes establecementos, acompañada da portavoz parlamentaria
de Cultura, Mercedes Queixas; do portavoz municipal de Vigo, Xabier Pérez, e das
deputadas viguesas Carmela González e Alexandra Fernández. Departamento de comunicación