GALICIA | GABADI
O BNG urxe ao Goberno a mediar para impedir o ERE en GABADI
MADRID | O deputado do BNG no
Congreso, Néstor Rego, acaba de rexistrar iniciativas para que o Ministerio de
Traballo actúe coa maior rapidez e impida a aplicación fraudulenta do ERE a 36
do persoal na empresa ferrolá GABADI. Así mesmo, a formación nacionalista
lembrou ao Goberno do Estado o compromiso adquirido, ao comezo da lexislatura,
para derrogar as Reformas Laborais que son lesivas e prexudiciais para a clase
traballadora.
A empresa GABADI, asentada na comarca de Ferrol, acaba
de fechar sen acordo o período de negociación dun ERE extintivo por causas
produtivas e organizativas. Este Expediente de Regulación de Emprego supón o
despedimento de 36 persoas dun total de 169 traballadores e traballadoras, máis
de 20% das empregadas. A empresa, na actualidade, conta cunha actividade moi
diversa dentro do mercado de construción naval e cunha ampla lista de clientes
a nivel internacional.
“Durante a negociación do ERE producíronse feitos que
desmenten a necesidade de executar os despedimentos posto que se tiveron que
levar a cabo unha enchente de horas extra e mesmo a contratación de empresas
externas para realizar os traballos” subliña o deputado nacionalista. Por este
motivo, Néstor Rego entende que o Ministerio de Traballo debe actuar “coa maior
rapidez” para evitar os abusos da empresa e “empregar todas as medidas ao seu
alcance para conseguir que GABADI renuncie a aplicación do ERTE”.
Durante o proceso de negociación, GABADI negouse a
asumir as alternativas propostas pola parte social como a de implantar unha
redución temporal de contratos. “Esta total falta de vontade de acordo ou de aceptar outras propostas que
solucionen o problema deixan en evidencia que a verdadeira motivación dos
despedimentos é coaccionar ás e os traballadores para conseguir esa
desregulación das condicións de traballo” explica o deputado nacionalista.
A debilidade da posición negociadora da representación legal dos e das
traballadoras como resultado da Reforma Laboral vixente.
“Os ERE están sendo aproveitados de maneira
fraudulenta por empresas como GABADI para o seu propio beneficio mentres existe
carga de traballo e mesmo contratan outras empresas vinculadas, como MONCINA,
para sacar todo o traballo adiante” apunta Rego. Alén do máis, o deputado
nacionalista subliña a necesidade de que o Ministerio de Traballo e o Goberno
do Estado interveñan cunha batería de medidas para evitar o deserto de
ocupación en NAVANTIA Ferrol e garantir carga de traballo”. Departamento de comunicación