GALICIA | POLÍTICA
Pontón: "A nova factura da luz penaliza ás familias e ás PEMES en plena crise"
SANTIAGO DE COMPOSTELA | O 1 de xuño entran en vigor os cambios na factura da luz coa desaparición
da tarifa nocturna para dar paso a un sistema de prezos por tramos horarios que
vai provocar un aumento da factura. As consecuencias foron denunciadas pola
portavoz nacional, Ana Pontón, ante a sede de Naturgy en Santiago, a
empresa con máis mercado en Galiza.
“As novas tarifas benefician ás eléctricas pero prexudican tanto as
familias como ás PEMES e ao conxunto da economía en plena crise”, denunciou a
líder do Bloque, tras reprochar que desde un Goberno que se autodenomina como o
máis progresista da historia se lexisle en contra da maioría: “A factura
eléctrica está determinada polo lobby enerxético
e polas portas xiratorias, -que parece que funcionan moi ben para o PSOE e para
o PP-, pero está en contra da maioría social encarecendo a factura da luz no
peor momento”, denunciou.
A maioría dos e das consumidoras van ter un aumento nos costes e condiciona
un posible aforro na factura a un cambio nos hábitos de vida. “Se unha familia non quere pagar máis pola
luz, ten que poñer a lavadora, usar a prancha, poñer o lavalouzas usar o forno
ou facer calquera tarefa que supoña consumo eléctrico a partir das doce da
noite,. Non sei se iso é o que entenden por conciliación o Goberno central e as
eléctricas”, interpelou Pontón. A líder nacionalista subliñou que as novas tarifas horarias dificulta
tanto á conciliación laboral e familiar como o descaso persoal e penalizan especialmente
ás mulleres ao ser elas as que maioritariamente asumen o traballo doméstico.
O Bloque destaca que hai tres colectivos e sectores especialmente
prexudicados coa nova factura. As
familias que até agora tiñan tarifa nocturna, arredor de medio millón de
fogares galegos para os que o incremento estimado pode chegar até o 30%,
ademais de poñerlle patas arriba a organización dos seus horarios.
En segundo lugar, castiga tamén ás pequenas explotacións gandeiras, unhas
10.000, que concentran as tarefas de alto consumo enerxético sobre todo nos
tramos horarios que pasan a ser máis caros. E, en terceiro lugar, castiga ao
sector da hostalería, un dos máis afectados pola pandemia, posto que a inmensa
maioría dos bares, cafeterías e restaurantes están pechados nas horas de
consumo máis barato e abertos nas horas de consumo máis caro.
Para corrixir os efectos negativos da nova facturación, Pontón avanza as
propostas do BNG. Primeira, levar o asunto ao Parlamento para pedir a retirada
dos aspectos máis lesivos da normativa. Segundo,
a formación nacionalista volve propoñer
a implantación da tarifa eléctrica
galega, “e acabar do desatino de que, sendo Galiza produtora neta de
electricidade, familias e empresas non
teñan ningún beneficio senón que, por contra, paguemos a factura máis cara”.
Como terceira proposta, a vía fiscal, de tal xeito que o Bloque defende
un IVE super-reducido do 4% en lugar do 21% que se aplica agora, “porque é un
servizo básico non un artigo de luxo”, alega, así como a supresión do imposto
especial de electricidade.
Preguntada polo proceso de desescalada, Pontón volveu insistir en
axilizar a campaña de vacinación, “porque é o mellor antídoto para loitar
contra o virus”, e considera “lóxico” que, se ese proceso avanza e os datos son
bos, “desescalar as medidas máis restritivas pero sempre desde a máxima prudencia
para non dar ningún paso atrás, nin botar pola borda o esforzo feito”. Departamento de comunicación