GALICIA | PESCA
O BNG reclama no Congreso medidas para salvar o sector pesqueiro galego tras o acordo do Brexit
MADRID | O deputado do BNG no Congreso, Néstor Rego,
reclama a través de varias iniciativas na cámara baixa incrementar as Reservas
de Axuste destinado ao sector pesqueiro e corrixir os criterios de repartición para
teren en conta as zonas máis afectadas polo acordo e máis dependentes da pesca.
Así mesmo, Rego urxe transferir a xestións dos fondos pesqueiros á Xunta e programar plans de soporte económico e social para o sector e ás zonas
máis afectadas polo acordo entre a Unión Europea e o Reino Unido.
In extremis foi o acordo acadado que entrega 25% das cotas de pesca europea ao Reino
Unido a cambio do acceso ás súas augas durante cinco anos e medio. Estas
medidas supoñen un enorme agravio para o sector pesqueiro galego que cualifican
de “moi negativas” as consecuencias do acordo, agora- posto que aínda non
existe un acordo sobre as cotas de 2021 prorrogándoas até o mes de xullo- e
para o futuro.
“Máis de 70 barcos dos 88 totais do Estado español que pescan en augas
británicas pertencen á frota galega sumando tamén os buques nas Malvinas. Máis
de dúas mil persoas que traballan ás que se lle suman os barcos de bandeira
británica mais de capital galego” enfatiza o deputado nacionalista. Un informe
da Universidade de Santiago calcula que o impacto económico do Brexit sobre a
pesca galega é de 535 millóns de euros. As perdas estimadas dos barcos galegos
superan os 9 millóns de euros só neste ano, “cantidade que podería aumentar se
o TAC diminuíra”.
O Consello da UE acordou un paquete de axudas para o sector que ascendía a
5.000 millóns de euros para aquelas empresas afectadas que constituían a
Reserva de Axuste do Brexit (BAR). Mais no reparto destas axudas, tan só 0,25%
do total dos fondos pesqueiros chegou ao Estado español a pesar de que “as
capturas dos barcos do Estado español en augas británicas representan 1% do
conxunto da frota europea”.
“Os criterios de repartición empregados son o valor
das capturas no Reino Unido por cada Estado membro ponderado pola súa
dependencia das augas británicas” subliña Rego. Así mesmo, o deputado explica
que non se teñen en conta outros caladoiros fóra dos do Gran Sol como, por
exemplo, as Malvinas ou, tampouco, a cesión da cota de bacallau de Svalbard
onde a frota do Estado español perdeu parte importante das posibilidades de
captura que acaparaba.
Por outra banda, a proposta prevé distribuír o
orzamento total en dúas asignacións. Unha este ano, de ao redor 4.000 millóns
en forma de prefinanciación, e outra, de 1.000 millóns a partir do ano 2024,
para cubrir o gasto que supere a asignación inicial, sen ter en conta que o
propio acordo entre a Unión Europea e o Reino Unido termina en xuño de 2026.
“Son uns criterios de repartición absolutamente
cuestionábeis e discriminatorios, un orzamento para o sector absolutamente
insuficiente en relación co total da Reserva de Axuste e totalmente irrisorio
no caso do Estado español que afectará gravemente a Galiza se non se corrixe”
afirma o deputado da frente nacionalista. Co Regulamento da Reserva de Axuste
do Brexit, “unha vez máis volve agraviarse á frota pesqueira galega, sobre a
que xa pesa a distribución anual de TACs da propia UE, a perda de dereitos e a posibilidade
de pesca continuada, os altos custos da carga regulatoria que sofre e, agora, a
perda de novas cotas que non se van a recuperar xunto á incerteza de quedar a
expensas dunhas negociacións anuais despois do 2026 que lle impiden planificar
o seu futuro e que condicionan os seus investimentos”.