HOCKEY PATINES
Inés Rey: "O Deportivo Liceo volveu facer historia pola cidade"
A CORUÑA | A alcaldesa da cidade, Inés Rey, recibiu hoxe, acompañada da
concelleira de Deportes, Mónica Martínez, no pazo municipal de María
Pita os xogadores do Hóckey Club Liceo, que onte gañou na nosa cidade a
súa décima Copa do Rei. Os liceístas fixéronse coa vitoria deste torneo
17 anos despois grazas a tres tantos de Adroher e César, que fixeron
vibrar ás máis de mil persoas que estiveron no encontro no Pazo dos
Deportes de Riazor. O acto contou coa presenza do presidente do club,
Daniel Echevarría.
A rexedora asegurou que o Deportivo Liceo volveu "facer historia pola
cidade" e que os liceístas "fan máis grande á nosa cidade". A historia
do Liceo é unha crónica de superación, sinalou Rey, "unha verdadeira
epopea, unha traxectoria digna de ser encomiada e narrada, unha
verdadeira xesta da que debemos estar moi orgullosos e ser conscientes
do que supón para a nosa cidade, pola cidade".
A alcaldesa confirmou que á terceira foi a vencida, xa que "despois
de dous finais da Copa do Rei consecutivas perdidas contra o Barça, o
Liceo volveu superar ao equipo azulgrana conquistando o décimo título da
súa historia, unha coroa que non gañaba desde hai 17 anos, cando bateu
ao Igualada na final celebrada en Jerez de la Frontera". Así, Rey
lembrou que o hóckey "é un deporte dominado na elite por unha rexión, e
só un grupo irredutible de cor verde foi capaz durante lustros de
plantarlles cara na máxima categoría nacional e en Europa", así que,
apuntou, "é necesario que o visibilicemos porque ás veces non somos
conscientes do que representa éxito, do que é o Liceo en Europa".
Pola súa banda, tanto o capitán David Torres, como o presidente do
Hóckey Club Liceo, Daniel Echevarría, expresaron a súa felicidade polo
título acadado, "un éxito para a cidade", e confían que sexa "o primeiro
dunha cadea de moitos".
Echevarría lembrou a todas aquelas persoas que por mor das
restricións da Covid non puideron estar presentes na final, e
agradeceulle ao Concello e ao resto das institucións da cidade o sei
apoio. Departamento de comunicación