GALICIA | POLÍTICA

Pontón reta a Feijóo a poñerse do lado de Galicia ante a estafa das eléctricas

SANTIAGO DE COMPOSTELA | A portavoz nacional, Ana Pontón, retou ao presidente da Xunta, Alberto Núñez Feixóo, a poñerse do lado dos galegos e as galegas fronte á “estafa” das eléctricas e apoiar a proposición de lei que defenderá o BNG neste pleno parlamentario “para que a riqueza eléctrica do país reverta no desenvolvemento económico de Galiza”. 

Pontón avanzou que esta proposición de lei ten como elemento esencial “algo tan básico” como que a riqueza eléctrica beneficie aos galegos e galegas con dous obxectivos principais: reducir o prezo da luz, “porque -recalcou- é un ben básico de primeira necesidade” e compensar o papel produtor de Galiza. “Non pode ser que asumamos os custes sociais e ambientais e o que nos veña de volta sexa unha factura da luz que é unha estafa”, incidiu. 

Neste sentido, a portavoz nacional afondou nalgunhas das propostas que recolle a proposta lexislativa do BNG e entre as que se inclúe “acabar cos denominados beneficios caídos do ceo” xa que, segundo subliñou, estamos ante “un timo” dunhas poxas polas que toda a electricidade que entra no mix se paga ao prezo máis caro. “É como se vou á peixería e merco xarda, xurelo e percebe e pago todo a prezo de percebe”, exemplificou.

De igual xeito, tamén propón a redución dos impostos que pagamos na factura dado que “temos unha carga impositiva moi elevada e hai custes que teñen que ir aos OXE, como a moratoria nuclear ou os custes extrapeninsulares”, salientou Pontón, quen a continuación defendeu de novo a necesidade dunha tarifa eléctrica galega, tamén recollida nesta proposición de lei. 

“Trátase de baixar as peaxes da factura nas zonas produtoras”, indicou para engadir que é “unha cuestión de xustiza e de sentido común” e algo que xa acontece en moitos países da nosa contorna como Alemaña, Reino Unido, Suíza ou Noruega. Así mesmo, avanzou que a proposta de lei nacionalista tamén inclúe unha tarifa industrial “estable e competitiva”, o que permitiría “ofrecer unha solución ás electrointensivas, cun prezo estable e competitivo, pero con obriga de plans industriais”. 

Pontón enmarcou esta proposición de lei nun contexto no que a escalada do prezo da electricidade alcanza “récords diarios” e está inmersa “nunha punta ascendente que pon os pelos como escarpias”. “Fai exactamente un ano o prezo do MWh eléctrico era de 35 euros/Mega; hoxe está en 154 e subindo”, advertiu para a continuación censurar que isto supón “beneficios multimillonarios para o lobby eléctrico e facturas ruinosas para as familias e as pemes”. 

Segundo remarcou, Galiza sofre ademais o “agravante” de ser un país rico en electricidade que paga os custes ambientais e sociais, polo que reprobou que “o que recibimos a cambio é unha estafa que afecta a miles de familias e que pon en risco miles de postos de traballo”.  

“Cando sobre un ben público de primeira necesidade, como é a luz, decide o lobby eléctrico, a través das portas xiratorias de PP e PSOE, temos que preguntarnos cal é a calidade desta democracia”, reflexionou, para a continuación censurar o papel da Xunta. “E cabe preguntarse para quen traballa o señor Feixóo cando a resposta a esta estafa é unha multa ridícula de 25.000 euros ás eléctricas que, ademais de estafarnos, atentan contra o noso medio ambiente”, criticou en referencia ao baleirado dos encoros que, segundo concluíu, lles permite “seguir forrándose”. Departamento de comunicación