GALICIA | POLÍTICA
O BNG encara a XVII Asemblea Nacional baixo o lema "Gañar unha nova Galiza"
Terá lugar o día 7 de novembro no Coliseum da cidade da Coruña onde serán aprobadas as liñas políticas para os vindeiros anos.
SANTIAGO DE COMPOSTELA | A deputada do BNG, Olalla
Rodil e o secretario de Comunicación, Xavier Campos presentaron o lema e imaxe
gráfica da vindeira XVII Asemblea Nacional da formación nacionalista que terá
lugar o 7 de novembro no Coliseum da cidade da Coruña.
Baixo o lema “Gañar unha nova
Galiza”, o BNG encara a XVII Asemblea
Nacional con dous obxectivos: ensanchar a base social do BNG e conseguir o
cambio político e transformador que precisa Galiza cunha Xunta presidida, por primeira vez, por “unha muller
nacionalista e feminista como Ana Pontón”, afirmou a deputada, Olalla Rodil.
Hoxe mesmo, explicou Rodil comeza o
proceso de debate nas asembleas comarcais e locais. A tese política e
organizativa serán debatidas entre os días 4 e 22 de outubro porque no BNG,
dixo, “todas as decisións son tomadas de maneira asemblearia, nun proceso
democrático e participativo” e son as os nacionalistas os que deciden “o rumbo
da organización e a súa dirección política”.
Será a militancia, recalcou Rodil, a
que decidirá a “liña política da organización” para os próximos anos. Estamos
nun momento de “grandes retos” e o BNG pechou a etapa do 2016 e 2021 que
valoramos “exitosa” recuperando a voz no Congreso, representación na eurocámara
e pasar de seis deputadas e deputados a dezanove, liderando a oposición e converténdonos
na alternativa política.
Tras esta etapa que pechamos agora,
estivemos moi centradas na renovación do proxecto do BNG, tanto nas equipas,
liderazgos, comunicación e propostas. Agora “abrimos un novo ciclo” con dous
grandes obxectivos: “ensanchar a base social do BNG e conseguir o cambio
político e transformador que precisa o noso país”, para todo isto, engadiu a
nacionalista, é fundamental poñernos a traballar para que no ano 2024 a Xunta
de Galiza estea presidida, por primeira vez, por “unha muller nacionalista e
feminista como Ana Pontón”, reiterou Rodil.
Gañar X GZ, Gañar unha nova Galiza!
Pola súa parte, o secretario de
Comunicación do BNG, Xavier Campos recalcou que o BNG “abre unha nova etapa”
coa celebración da Asemblea Nacional e cunha mensaxe que queremos enviar dende
o primeiro día “imos saír a gañar” e por iso o noso lema, “Gañar unha nova
Galiza” define claramente a ilusión e ambición política que nos vai mover nos
vindeiros anos. Con gañar queremos dar resposta a unha expectativa social que
vai máis alá dos votantes do BNG porque estamos seguros e seguras de que unha maioría
social quere cambio e ten como referencia a “Ana Pontón e ao Bloque
nacionalista galego”.
Nesta nova etapa, afirmou “saimos a
gañar e a presidir a Xunta de Galiza no ano 2024” a través dun reforzo
organizativo e militante do BNG nestes anos. Ademais, dixo, o noso lema tamén
leva “unha nova Galiza” porque queremos “gobernar e transformar o país”. Para o responsable de comunicación, o lema da XVII Asemblea
recolle “a vontade de ambición por gobernar o noso país e polo seu avance”. O
lema e o deseño do cartaz, indicou é coherente coa liña estética do BNG nos
últimos anos e simboliza un “X GZ” simbolizando o elemento central que nos
move, “traballar por Galiza e a lealdade á sociedade galega”. Departamento de comunicación