GALICIA | POLÍTICA
Pontón tira de hemeroteca e retrata a un Feijóo que "busca culpables"
SANTIAGO DE COMPOSTELA | A
portavoz nacional, Ana Pontón, botou man da hemeroteca para retratar a un
presidente da Xunta que, incapaz de aportar solucións aos grandes problemas de
Galicia, busca culpables, nun exercicio de escapismo político inútil para o
País. A través da lectura de unha vintena de titulares, -“aínda que podería
seguir durante horas” alegou-, a líder do Bloque demostrou que “culpar” é o verbo que máis conxuga Feijóo
para botar balóns fora.
“A iso se reduce a súa acción de
goberno, a buscar culpables porque é incapaz de dar solucións e, por iso, estende
o seu dedo acusador e culpa á cidadanía, á mocidade, ás empresas, á crise, a
Portugal, a Catalunya, ao BNG e, como agora non goberna o PP, tamén ten Moncloa
de comodín”, denunciou na sesión de control. “A súa é unha maneira inútil de
afrontar os problemas do País”, sentenciou.
“Onde está a súa solución para ALCOA,
onde as súas propostas para os produtores ante os baixos prezos, onde están as
axudas ou para cando una mesa na que sente aos gandeiros, a industria e as
grandes superficies; onde están os seus plans para darlle futuro á mocidade,
para reforzar a sanidade pública ou cando vai deixar de vetar unha tarifa
eléctrica galega en lugar de seguir abrazado ao lobby eléctrico”, foron algúns dos asuntos que Pontón puxo sobre a
mesa para demostrar a falta de alternativas do xefe do Executivo. “O único que
lidera son as críticas”, sentenciou.
E máis, a líder nacionalista ironizou
sobre a “obsesión” do presidente do PP co Bloque, advertíndolle que por moitas
campañas que lance non vai impedir o avance do BNG. “Deixe de hiperventilar co
BNG e póñase a gobernar”, demandou a portavoz nacional, tras reclamarlle a
Feixóo que se tome Galiza en serio, e iso pasar por gobernar “en lugar de vir
ao Parlamento a difamar ao BNG e a súa portavoz”.
A líder nacionalista tamén lle reprochou
a Feijóo que pretenda presumir dun balance que é nefasto para Galicia. “Campión
de que?, interpelou, 14.000 empregos perdidos na industria, case 17.000 no
sector agrario, 200.000 mozos e mozas que tiveron que coller as maletas e di
que todo vai ben. Deixe de pisar moqueta e pise a realidade dos galegos e das
galegas que están pasando por un momento moi complicado”, concluíu. Departamento de comunicación