GALICIA | SECTOR NAVAL
O BNG e CIG-Industria reclaman coeficientes reductores na xubilación do naval
MADRID | O deputado do BNG no Congreso, Néstor Rego, xunto cunha
delegación nutrida de representantes da organización nacionalista na comarca de
Ferrol, mantén un encontro con representantes da CIG do sector naval de Vigo e
Ferrol para a posta en común de iniciativas reclamando
a aplicación de coeficientes redutores na idade de xubilación para este sector.
A reunión contou coa presenza, ademais do deputado do BNG no
Congreso, do deputado no Parlamento de Galiza, Mon Fernández; o alcalde do
Concello de Fene, Juventino Trigo, e a voceira do BNG en Fene, Sandra Permuy; o
voceiro no Concello de Ferrol, Iván Rivas; e a responsábel comarcal da
organización frentista, Mercedes Tobío. Por parte da
Confederación Intersindical Galega (CIG), entre os distintos representantes das traballadores e traballadoras
do sector naval, estiveron presentes o secretario comarcal da CIG Ferrolterra,
Manuel Grandal, e o Secretario Nacional da CIG-Industria, Xosé Manuel Bouzas.
No
marco desta reunión entre a frente sindical e a organización nacionalista sobre
a aplicación de coeficientes redutores na idade de xubilación deste sector, o deputado do BNG no Congreso comprometeuse a trasladar estas reclamacións a través de
iniciativas na cámara baixa, posto que é unha competencia de ámbito estatal a
través do Ministerio de Seguranza Social, Inclusión e Migracións.
“Parécenos de xustiza esta reclamación e asumimos como propia a
demanda de aplicar coeficientes redutores para as traballadoras do sector naval
polas condición de traballo que posúen: toxicidade, perigosidade, penosidade e
mesmo elevado índice de sinistralidade” reivindica o deputado nacionalista.
Avanza iniciativas no Parlamento de Galiza para que haxa un apoio explícito aos
traballadores e traballadoras do sector.
Rego entende que o auto denominado goberno máis progresista da
historia “vai na dirección equivocada mais iso non nos vai frear para defender
o que entendemos que é razoábel”. Este sector posúe condicións de traballo
similares a outro tipo de traballos que “xa teñen aplicados este tipo de
coeficientes redutores”.
“En vez de tender a reducir a idade de xubilación, o executivo do
Estado acaba de aprobar unha reforma que consolida os elementos máis regresivos
para os traballadores e traballadoras” recrimina Rego. Entre eles, o aumento da
idade de xubilación aos 67 anos e o período de cómputo de 15 a 25 anos. “O peor
é que engaden a incentivación da xubilación demorada, é dicir, continuar
traballando até os 70 anos ou ameazan cun novo aumento do
período de cómputo mesmo até 35 anos” denuncia o deputado nacionalista.
Sector naval como sector
estratéxico para Galicia
Ambas organizacións entenden que existe a posibilidade de reverter
a perda de dereitos e o empeoramento das condicións de laborais
das traballadoras e traballadores dun sector
estratéxico para o desenvolvemento social e económico da Galiza. “Non é
asumíbel seguir aumentando a vida laboral destes traballadores e retrasar aínda
máis a idade de xubilación cando polas súas condicións de traballo deberían de
verse reducidas” subliña o Secretario Nacional da CIG-Industria, Xosé Manuel
Bouzas. “A idade de xubilación para este sector debería ser anticipada, a
partir de 60-61 anos, e non 65-67 como quere estabelecer o Goberno do Estado”
incide.
Bouzas lembrou que a central sindical comezou esta campaña en
2018. E a falta de vontade do Ministerio quedou patente cando tardou máis de
oito meses en trasladarlles unha resposta ao escrito no que reclamaban o
recoñecemento de coeficientes e sinalaban a necesidade
de mellorar as condicións laborais do sector. Mais na resposta, o Ministerio de
Seguranza Social, négase a comezar o procedemento e mesmo non recoñece a CIG como “entidade lexitimada para facer esa
petición” a pesar de ser o sindicato máis representativo. “Non só por ser a
primeira forza sindical da Galiza e contar como sindicato máis representativo a
nivel do Estado” enfatiza o Secretario. Departamento de comunicación