GALICIA | VIVENDA
O BNG desmonta cos datos oficiais as políticas de vivenda da Xunta: "Son unha gran mentira, unha gran estafa"
SANTIAGO DE COMPOSTELA | Á portavoz nacionalista de Vivenda, Alexandra Fernández, abondoulle unha
soa intervención no Parlamento galego para desmontar, cos propios datos
oficiais, as políticas de vivenda da Xunta. “Son unha gran mentira, unha grande
estafa”, concluíu despois de debullar as cifras do Instituto Galego de
Estatística (IGE), o Ministerio de Fomento e mesmo o informe de seguimento do
Plan Estratéxico de Galicia 2018-2020.
Así,
recordou que entre 2015 e 2020 o Goberno do PP só iniciou 400 vivendas
protexidas en toda Galiza, fronte ás 4.200 iniciadas só en 2006; é dicir, o
Executivo Feixóo só comezou a décima parte das vivendas protexidas que se
facían antes de acceder á presidencia. Ademais, durante este período
rexistráronse anos enteiros de “auténtico deserto”, como en 2015, con tan só 5
vivendas iniciadas; 2016, con tan só 4 e 2017, con tan só 5. “Prometían
vivenda pública e paralizaron a vivenda pública”, reprobou Fernández, quen
tamén advertiu que entre os anos 2014 e 2018 só houbo en todo o País unha única
vivenda pública en réxime de alugueiro.
De
igual xeito, e segundo o propio informe de seguimento da Xunta do Plan
Estratéxico de Galiza 2018-2020, a superficie de solo adquirido foi de 0 m2
en 2018 e 0 m2 en 2019, “a inacción máis absoluta”. “Paralización da
adquisición e preparación de solo público e paralización da construción de
vivenda protexida”, recriminou, para subliñar a continuación que a falta de
impulso de solo público e de vivenda protexida supón que a Xunta é
“corresponsable, por inacción, da actual subida de prezos e de deixar
desprotexida á xente deste País”, todo o contrario ao que prometera e mesmo
comprometera no seu Plan de Vivenda 2015-2020. Ao seu xuízo, o Executivo do PP
“anuncia o que a xente espera dos seus plans de vivenda e despois fai todo o
contrario”.
“É
bastante revelador que vostedes non rebatan estes datos e é probable que non o
fagan porque teñen absolutamente normalizado que era unha gran mentira ao que
se comprometeran”, afeou á bancada do PP na súa quenda de réplica, na que tamén
repasou os flagrantes incumprimentos noutras áreas das súas políticas de
vivenda, como por exemplo, o compromiso de reducir co citado plan o colapso de
máis de 15.000 persoas inscritas no Rexistro de Demandantes de Vivenda.
“Despois dos cinco anos de vixencia do plan, cal foi o resultado? O mesmo, máis
de 15.000 persoas inscritas”, resumiu.
Nesta
mesma liña, repasou “o bluf da rehabilitación” a través do programa Rexurbe,
que comprometía 1,7 millóns para rehabilitación do parque de vivenda pública e
200.000 euros para crear oficinas de rehabilitación con 0 e 0 euros executados,
respectivamente. “Lonxe de desculparse por rehabilitar só 9 vivendas das 1.500
comprometidas en 2016, na campaña electoral de 2020 redobran a aposta e
comprometen 3.000 ao longo da lexislatura, algo que todas e todos sabemos que
non van cumprir porque significaría obrar o milagre de 750 vivendas por ano cun
orzamento de tres millóns de euros, que foi o que executaron dos oito millóns
co que estaba dotado este plan”, censurou.
Fernández
engadiu que o mesmo acontece con outros programas como os relativos á vivenda
baleira, “con tan só 30 vivendas baleiras mobilizadas en catro anos” ou o
programa Rehaluga, “con tan só dúas axudas concedidas por un importe total de
6.907 euros”.
“Vendo
estas cifras enténdese mellor porque vostedes foxen de render contas”, ironizou
sobre o veto do PP á proposición non de lei nacionalista para que a Xunta
entregue de xeito inmediato ao Parlamento o informe de avaliación do Plan
Rehavita, Plan galego de rehabilitación, aluguer e mellora de acceso á vivenda
2015-2020, do que o Goberno galego leva un ano negándose a remitir á Cámara
pese a comprometerse a facelo, a última vez e a iniciativa do BNG, a finais do
ano pasado. Departamento de comunicación