CASO ALU IBÉRICA

O Congreso aproba a iniciativa do BNG para a intervención pública de Alu Ibérica na Coruña

MADRID | O deputado do BNG no Congreso, Néstor Rego, consegue aprobar a iniciativa defendida na Comisión de Industria, Comercio e Turismo da cámara baixa. A iniciativa insta o Goberno do Estado a garantir a continuidade da actividade na planta de Alu Ibérica na Coruña, así como o mantemento dos postos de traballo para o que, se for preciso, se levará a cabo unha intervención pública temporal da planta por parte da SEPI.

Despois de dous anos de completa inacción por parte do Ministerio de Industria, Comercio e Turismo, a formación nacionalista consegue aprobar unha nova iniciativa na cámara baixa para garantir o futuro da planta de aluminio na Coruña. Unha planta da que dependen máis de 300 postos de traballo directos e que “está vivindo momentos decisivos”. Após unha pequena mudanza, por medio dunha transaccional, a resolución da Comisión de Industria fica como segue: “Instar o Goberno do Estado a:

1.- Realizar todas as xestións necesarias, en colaboración e coordinación coa Xunta de Galiza e os representantes dos traballadores, para lograr unha solución urxente que asegure a continuidade da actividade industrial e o mantemento do emprego na planta de  Alu Ibérica da Coruña.

2.- Axilizar a adopción de medidas que favorezan que a factoría estea nas mellores condicións para manter a súa capacidade produtiva e evitar a destrución de emprego e, en particular, articular unha solución que asegure a subministración eléctrica necesaria para reactivar a electrólise a un prezo competitivo.

3.- No caso de que sexa preciso, levar a unha intervención temporal por parte da  SEPI da planta de  Alu Ibérica co fin de facilitar a posterior venda a un investidor privado que garanta un proxecto industrial viable.” A iniciativa foi aprobada cos votos a favor de todas as formacións políticas presentes na Comisión de Industria excepto o PSOE e VOX. Departamento de comunicación