PROXECTOS EÓLICOS
O BNG arranca ao Goberno o compromiso de recuperar a participación pública nos proxectos eólicos
MADRID | No proceso de convalidación ou derrogación do decreto
6/2022, que foi votado nesta quinta feira no Congreso, o BNG negociou co
Goberno a tramitación posterior como proxecto de lei e o compromiso de
recuperar a participación pública nos proxectos eólicos de entre 50 e 75 Mw que
este decreto eliminaba. Néstor Rego consegue que o PSOE se comprometa a
reactivar a Axenda Galega recollida no Acordo de Investidura, para o que a
Comisión Mixta de seguimento se reunirá antes da cuarta feira, 11 de maio.
O BNG
foi moi crítico co decreto 6/2022 por considerar que era insuficiente e que non
incorporaba medidas de calado realmente eficaces para pór couto á escalada
descontrolada dos prezos que está a provocar empobrecemento das clases
populares. No entanto, “cando se trata de decidir se as medidas recollidas
continúan en vigor ou decaen, o BNG, por responsabilidade política, opta porque
se manteñan medidas como as axudas a sectores como a pesca, o agro, os
transportes, a subvención aos carburantes ou o aumento do IMV e, por tanto,
vota a favor do decreto”, sinala Néstor Rego.
A
cambio deste apoio, o BNG arrancou ao Goberno español o compromiso de modificar
a normativa en relación aos parques eólicos de entre 50 e 75 Mw para recuperar
a participación social a través dun proceso de exposición e alegacións que este
decreto eliminaba. Asimesmo, o compromiso de revisar unha “zonificación” que
non ten en conta a realidade galega. De facto, as medidas recollidas neste
decreto foron moi criticadas polos colectivos ambientalistas e de persoas
afectadas por proxectos eólicos.
“Estas
mudanzas deberán verificarse no proceso de tramitación do actual decreto como
proxecto de lei, que esperamos que se faga canto antes. No BNG somos
conscientes de que non resolven todas as dificultades engadidas no proceso de
implantación de parques eólicos, mais, sen dúbida, supoñen unha mellora en
relación co previsto no decreto”, subliña o deputado nacionalista, que avanza
que o BNG pelexará por unha modificación máis profunda.
Por
outra parte, o deputado do BNG conseguiu tamén o compromiso de reactivar a
Axenda Galega recollida no Acordo de Investidura, en relación con medidas que o
Goberno aínda ten pendentes de cumprir, para o que a Comisión Mixta de
seguimento se reunirá antes da cuarta feira, 11 de maio. Departamento de comunicación