REDACCIÓN | Agora sí é o momento de activar a conta
atrás. O salón de plenos do Concello de Marín albergou este mércores a
presentación oficial das dúas finais da Copa Galicia de fútbol sala, un
evento único que terá lugar o vindeiro martes 17 de maio, o Día Das
Letras Galegas, no pavillón da Raña.
O consistorio marinense foi precisamente
o espazo elixido para dar este mércores o pistoletazo oficial de saída á
competición cun acto no que estiveron presentes o vicepresidente da
RFGF e máximo responsable do fútbol sala en Galicia, Pablo Prieto; o
vicepresidente da RFGF, José Manuel Fernández; a alcaldesa de Marín,
María Ramallo; o coordinador do deporte base en Pontevedra, José Manuel
Freire; e os concelleiros Antonio Traba e Antonio Caíña.
Trátase da XXX edición masculina da Copa
Galicia e da XV edición na categoría feminina, sendo unha competición
do máis alto nivel autonómico que poderá verse no Pavillón da Raña, "que
xa é como a nosa casa", tal e como declarou na presentación Pablo
Prieto.
Na final feminina, que será ás 17.00
horas, enfrontaranse o Ourense Envialia FSF e o Poio Pescamar FS. Pola
súa parte, na masculina, ás 19.30 horas, loitarán polo título autonómico
O Parrulo Ferrol e o Noia Portus Apostoli.
No evento tamén estiveron os representantes dos catro clubs finalistas nestas edicións da Copa Galicia. Ler máis