CASO REI EMÉRITO
O BNG solicita a comparecencia de Marlaska e Bolaños en relación coas vacacións de Juan Carlos de Borbón en Sanxenxo
MADRID | O deputado
do BNG no Congreso, Néstor Rego, vén de rexistrar as solicitudes de
comparecencia na cámara baixa dos ministros de Interior e Presidencia para que
expliquen a posición do executivo estatal a respecto da visita a Sanxenxo do Ex-Xefe
de Estado fugado. A organización nacionalista quere coñecer a canto ascenden os
custos das vacacións do Borbón en cuestións como transporte e a seguranza nestes
días na localidade pontevedresa e en Madrid. Rego exixe coñecer se o Goberno considera
correcto que Juan Carlos de Borbón volte ao Estado español sen que dese ningún
tipo de explicación sobre as múltiples acusacións de corrupción, cobro de
comisións, fraude fiscal e, mesmo, en relación ás informacións sobre a súa
participación no tráfico de armas.
Estas iniciativas súmanse ás xa
rexistradas anteriormente pola organización nacionalista para coñecer a
posición do Goberno en relación co regreso de Juan Carlos I e mesmo se o
executivo participou, conxuntamente coa Casa Real, na preparación da visita. “Queremos
coñecer a canto ascende o custo do dispositivo de seguranza organizado para a
mobilidade do Ex-monarca fugado, así como cantos elementos das forzas e corpos
de seguridade están a participar neste dispositivo” reclama o deputado do BNG
que ve “inxustificábel a alfombra vermella que o Goberno está a pór a un ex-xefe
do Estado que polas diversas informacións sobre actividades presuntamente
delituosas xa se ten convertido en símbolo da corrupción institucionalizada”.
“Solicitamos a comparecencia do
Ministro de Presidencia para que explique a posición do Goberno en relación coa
volta de Juan Carlos de Borbón e se a considera adecuada politicamente tendo en
conta que aínda non deu ningún tipo de explicación sobre as múltiples
acusacións de corrupción, cobro de comisións, fraude fiscal e mesmo en relación
ás informacións sobre a súa participación en tráfico de armas” salienta Rego.
Así mesmo, o BNG tamén solicita a
comparecencia do Ministro do Interior en Comisión para que que “informe sobre canto custará ao erario
público a estadía do Borbón na Galiza e no Estado español, particularmente en
relación co traslado e a seguranza durante a súa visita”.
En opinión do deputado
nacionalista, o executivo estatal está contribuíndo, coa posición manifestada
pola portavoz do Goberno e outros membros do Goberno, para deteriorar aínda
máis a credibilidade das institucións
españolas “protexer un ex xefe do
Estado envolto en numerosos escándalos económicos e fiscais”.
Rego reiterou que o BNG considera
incompatíbel cun réxime realmente democrático unha xefatura do Estado que non é
votada pola cidadanía senón vitalicia, hereditaria e que foi designada polo
ditador Francisco Franco. Unha xefatura do Estado que, aliás é “inviolábel” e
non está suxeita a “responsabilidade” mesmo que foren coñecidas actividades
irregulares e corruptas -como aconteceu con Juan Carlos, mais tamén que
salpican a Felipe de Borbón-, o que significa impunidade para delinquir.
“É unha
burla ao conxunto da cidadanía que despois de se fugar para evitar a actuación
da xustiza teñamos que pagar as vacacións ao Borbón corrupto” denuncia o
deputado do BNG. Rego lembra que a xustiza española abriu unha causa contra
Juan Carlos pola presión social e após o faceren outros países como a Suíza ou
a Gran Bretaña. “O feito de que as fechasen por “falta de probas”, prescrición
ou por corresponderen ao período en que por ser Xefe de Estado era
“inviolábel”, vén a demostrar, máis unha vez, que é falso aquilo que tantas
veces o Borbón repetiu sobre que ‘a xustiza é igual para todos’, mais hai que
lembrar que aínda terá que responder diante da xustiza británica”, subliña
Rego. Departamento de comunicación