GALICIA | POLÍTICA
Pontón critica que o Goberno do PP siga cruzado de brazos mentres os prezos afogan á clase traballadora e ás PEMES
SANTIAGO DE COMPOSTELA | A subida de prezos segue imparable cun IPC en Galiza do 9,6%, un punto
por riba da media estatal nun País coas pensións e salarios á cola,
afogando ás familias, clase traballadora e ás pequenas e medianas
empresas. Neste contexto, a portavoz nacional, Ana Pontón, preguntase
até cando vai seguir o Goberno do PP “cruzado de brazos”.
“Galiza
está sufrindo máis a inflación e, por tanto, soportando unha maior
perda do poder adquisitivo e por iso me pregunto que espera o Goberno da
Xunta para tomar medidas a favor das persoas con menos recursos”,
interpelou Pontón, tras o encontro coa directiva de COGAMI e a visita a
Coregal e Trameve, empresas de referencia no sector da economía social.
A
líder do BNG puxo sobre a mesa as propostas da formación nacionalista
para paliar o impacto da inflación, con medidas destinadas a axudar ós
colectivos con menor nivel de ingresos e ó tecido de PEMES, mobilizando
para iso 700 millóns de euros que permitan sufragar medidas tan concretas como, por
exemplo, o incremento do complemento autonómico das pensións non
contributivas, arredor de 37.000, as máis baixas.
Igualmente,
explicou, o Bloque aposta por aumentar a Risga e facela compatible co
IMV, así como incrementar as axudas para gastos básicos de vivenda ás
persoas con menores rendas, tendo en conta que é precisamente unha das
rúbricas do IPC que máis sube, nada menos que un 21,8% en maio, pois
computa o aumento de gastos como vivenda, auga, luz, ou gas. Medidas
que se complementan cun plan de axudas directas as pequenas e medianas
empresas dos sectores produtivos máis impactados pola espiral
inflacionista.
“Son medidas viables se hai vontade política e por
iso lle pedimos ó Goberno do PP que deixe de ter os brazos cruzados e
que actúe”, reclamou unha Ana Pontón que, xunto con estas medidas de
choque tamén puxo sobre a mesa medidas de carácter estrutural.
Empezando
por “establecer un tope máximo para o prezo da luz e dos carburantes
para evitar o que está sucedendo nas últimas semanas con medidas como a
subvención dos 20 céntimos nas gasolineiras, porque se están drenando
miles de millóns de euros de cartos públicos para as petroleiras pero
sen conseguir baixar os prezos”.
No paquete de propostas estruturais,
Pontón inclúe a subida de impostos ás eléctricas para que contribúan
coas súas multimillonarias ganancia a paliar a crise, cambios normativos
para acabar coa “aberración” dos beneficios caídos do ceo e a posta e
marcha dunha empresa pública de enerxía, como teñen outros países
europeos.
A líder do Bloque subliñou o momento de “extrema
dificultade económica” que está poñendo en perigo a supervivencia de
moitas PEMES, “e non pode ser que mentres temos a cidadanía en
dificultades o goberno da Xunta siga de brazos cruzados sen tomar
ningunha decisión no seu ámbito de competencias”, criticou.
Next Generation
A
portavoz nacionalista tamén destacou a preocupación pola xestión e
distribución que se está facendo dos fondos de recuperación Next
Generation, en base a unha centralización á que o BNG sempre se opuxo
por considerar que prexudicaba a Galiza, como así está sendo, “pero ese
deseño centralizador é compartido tanto polo PP como polo PSOE, pese a
ser prexudicial para o noso País”.
A estas alturas, alertou,
“non coñecemos ningún proxecto importante para Galiza que teña os fondos
garantidos e o Goberno da Xunta, e así llo trasladei ó presidente Rueda
no recente encontro, non está tendo unha estratexia intelixente nun
asunto no que hai tanta opacidade”. A proposta do Bloque, reiterou,
“pasa pola descentralización e por conseguir que eses fondos, -que non
son a panacea pero que son os únicos extraordinarios-, cheguen á pequena
e mediana empresa, ó tecido produtivo en lugar de quedarse nas mans
dunha presa de multinacionais”.
Por iso, sen coñecer que vai
trasladar o xefe do Executivo á vicepresidenta económica, Nadia Calviño,
a posición do BNG é que Galiza “non pode quedar discriminada no reparto
de fondos e estes deben chegar ó tecido empresarial galego, porque se
van para financiar a tres transnacionais será unha oportunidade
perdida”, concluíu. Departamento de comunicación