GALICIA | COGAMI
Pontón aplaude o traballo de COGAMI e propón un plan transversal de goberno de apoio ás empresas de economía social
SANTIAGO DE COMPOSTELA | A
portavoz nacional, Ana Pontón, mantivo un encontro con dirección de COGAMI, encabezada
polo presidente Anxo Queiruga, que aproveitou para poñer en valor o traballo desta
entidade e das súas empresas no ámbito da economía social, facilitando a
integración laboral e social das persoas con diversidade funcional.
“O seu traballo é importante para darlle
dereitos laborais ás persoas con discapacidade contribuíndo tamén a construír
unha sociedade e unha Galiza máis xusta, demostrando a capacidade, a
viabilidade e o bo facer das empresas deste sector”, destacou a líder do BNG durante
o encontro e posterior visita a dúas das empresas referentes da economía social
promovidas por COGAMI, como son Coregal e Trameve. “Ofrecen
servizos de calidade e rompen con moitas barreiras demostrando o seu potencial económico
e de integración”.
A economía social xera en Galiza máis de
25.000 empregos e representa un modelo polo que hai que apostar nun mundo que
avanza cara unha sociedade na que aumenta a desigualdade, “mentres que a
economía social ofrécenos a alternativa contraria, con empresas comprometidas,
que reinvisten no País e que, querendo ter beneficios, non é o seu principal
obxectivo, senón que apostan pola igualdade, pola conciliación, pola
integración e por un modelo máis xusto”.
Neste sentido, Pontón trasladou o apoio
do Bloque a COGAMI e as súas empresas de economía social, un sector que merece
máis apoio e máis impulso desde a administración pública. Por iso, a líder nacionalista propón que
a economía social forme parte dun plan transversal de goberno: “Iso é o que lle pedimos ao Goberno da Xunta,
un plan transversal para a economía social onde se impliquen todas as
consellerías para empuxar o desenvolvemento das empresas de economía social e, nesa
dirección, que conten con apoio para chegar ó medio rural e a concellos fora
das cidades”.
Outra medida de apoio é a reserva de contratos
na administración pública para as empresas deste sector, aproveitar novas oportunidades
como a que ofrece a Lei de xestión de residuos estatal que establece
unha reserva do 50% para as empresas de economía social na xestión de residuos téxtil
e voluminosos, cuestión que debe trasladarse tamén aquí. “A economía social é
un ámbito de futuro”, concluíu. Departamento de comunicación