REINO UNIDO
O BNG urxe a garantir o servizo de atención á cidadanía nos Consulados e Embaixada no Reino Unido
MADRID | O Bloque Nacionalista Galego vén de rexistrar
iniciativas no Congreso para que o Goberno solucione os problemas de millares
de persoas no Reino Unido, moitos deles galegos, pola falta de
atención na Embaixada e Consulados do Estado español. O deputado nacionalista,
Néstor Rego, demanda estabelecer dos medios necesarios para garantir unha
rápida e áxil xestión para renovar o pasaporte ou os trámites de primeira
emisión, así como asegurar os dereitos laborais das persoas que traballan na
Administración estatal no Reino Unido.
Máis
dun ano levan esperando moitas das persoas residentes no Reino Unido para poder
realizar xestións administrativas nos Consulados Xerais e a Embaixada do Estado
español. Renovar o carné de identidade, expedir o pasaporte ou renovalo son
trámites administrativos que, de normal, poden resolverse en cuestión de días,
mais na situación actual pode supor esperar meses sen resposta. A acumulación
de tarefas faise máis visíbel após o Brexit e o parón da pandemia, que levou a
esta administración ao colapso.
A
situación foi denunciada por numerosas persoas, todas elas coa mesma situación:
esperas de até 10 meses para poder renovar o pasaporte ou sen poder rexistrar
ás súas crianzas. “Empregaron todas as vías dispoñíbeis –pola web do
consulado, atención telefónica, por correo electrónico ou mesmo de maneira
presencial- mais a Administración segue sen dar unha solución ao problema de parálise”
explica o deputado nacionalista. Debe lembrarse que sen pasaporte estes
cidadáns e cidadás quedan atrapados sen poder saír do país. Deben renunciar ás
viaxes programadas, de carácter laboral, vacacional ou para visitar á familia,
o que lles supón un grave prexuízo tanto moral como económico.
“Declarouse
unha folga xeral indefinida o pasado 14 de marzo por parte do persoal
funcionario de todas as oficinas do MAEUEC no Reino Unido para reclamar
melloras nas súas condicións laborais e adecualas á situación do Reino Unido
tras o Brexit que paralizou a actividade durante máis dun mes” lembra o
deputado do BNG. O período post Brexit disparou a solicitude de trámites e xestións
por parte de residentes no Reino Unido e, en consecuencia, tamén o volume de
traballo, con horas extra sen remunerar e co salario conxelado desde fai trece
anos.
A
organización nacionalista demanda ao Ministerio de Asuntos Exteriores accións
urxentes para solucionar a situación que están a padecer os millares de persoas
atrapadas no Reino Unido pola falta de atención aos seus trámites ante a
Embaixada e Consulado do Estado Español. “O Ministerio ten que escoitar as
denuncias das traballadoras polos recortes abusivos que precarizaron os
servizos nestas oficinas, as condicións de traballo e mesmo os servizos
ofrecidos á cidadanía” destaca Rego.
“Hai
que estabelecer os medios necesarios para garantir unha rápida e áxil xestión
das solicitudes de renovación do pasaporte ou de primeira emisión no caso dos acabados
de nacer poñendo fin ás largas listas de agarda que se acumulan nestes momentos”
reivindica. Departamento de comunicación