LINGUA GALEGA
O BNG reivindica o uso da lingua galega no Congreso e o resto de linguas oficiais do Estado
MADRID | O Bloque Nacionalista Galego defendeu no pleno do
Congreso, unha iniciativa conxunta con outras forzas políticas de mudanza do
regulamento da cámara para posibilitar o uso de todas as linguas oficiais
durante a actividade parlamentar. A organización nacionalista reclama unha
verdadeira democratización do Estado, que pasa polo recoñecemento de que o
Estado español está conformado por varias nacións e pobos con diferentes
linguas e que todos os cidadáns teñan dereito a empregala sempre, en todo
momento e en todo lugar.
“Galiza leva padecendo máis de quiñentos anos de
imposición lingüística- imposición do español- é claro. Nese proceso, que levou
primeiro á marxinación e exclusión da vida pública da lingua que falaba a
poboación da Galiza e, mesmo a día de hoxe, un proceso de devalo permanente, de
perda progresiva de falantes, ten unha responsabilidade histórica e presente o
Estado español” comeza a intervención o deputado nacionalista.
Rego acrecentou que mesmo na actualidade, especialmente
após os 13 anos de Goberno do PP de Feixóo, as políticas públicas camiñaron no
sentido de atacar a normalización do galego. “Por exemplo,
derrogando o decreto de uso do galego no ensino e impondo o mal chamado
“Decreto de plurilingüísimo” que prohibe que materias como matemáticas,
Bioloxía ou Física e Química poidan ser impartidas na nosa lingua”.
“Hoxe traemos aquí unha cuestión que, sendo
simbólica, posúe unha relevancia excepcional desde a perspectiva dunha
verdadeira democratización do Estado español que pasa por recoñecer que neste
Estado convivimos nacións e pobos diferentes” explica o deputado nacionalista
en lingua galega. Reivindica a posesión do pobo galego dunha lingua propia e o
dereito a poder empregala “sempre, en todo momento e en todo lugar, en
igualdade de condicións aos falantes de español”.
Para a organización nacionalista, fica claro que
o fundamental é a normalización da lingua galega na Galiza, mais ao tempo
-segundo sinala Rego- “que deputadas e deputados poidan empregar no Congreso a
lingua do noso pobo, a lingua das persoas que nos elixiron, ten un valor
simbólico innegábel e, para alén do máis, con consecuencias prácticas. Sería o
recoñecemento a serio da realidade plurilingüe do estado e, por tanto, tamén da
necesidade de avanzar no contributo desde a administración estatal para a plena
normalidade das nosas linguas como, aliás, estabelece a Carta Europea das
Linguas que o Estado español ten asinado” subliña.
Ao ser chamado á orde por segunda vez pola
Presidente da cámara por estar a facer a súa intervención en lingua galega, o
deputado do BNG citou as declaracións en castelán relacionadas en 2001 polo
“Borbón corrupto e fuxido”, en que afirmaba que “nunca fue la nuestra lengua
de imposición”. Rego continuou a súa intervención en galego afirmando que
foi “unha mentira máis das moitas que contou desde a Xefatura de Estado, pois a
imposición do castelán na Galiza e a prohibición do galego ao longo de séculos
está sobradamente documentada”. O deputado nacionalista non puido finalizar a
intervención ao lle ser retirada a palabra polo presidente en funcións do
Congreso, a pesar de que ningún artigo do Regulamento indica que as
intervencións teñan que ser en español. Departamento de comunicación