DEPUTACIÓN DA CORUÑA
A Deputación lanza unha nova liña de axudas para apoiar aos festivais de iniciativa privada
A CORUÑA | A Deputación da
Coruña anunciou hoxe unha nova liña de axudas destinadas a entidades privadas
para apoiar a celebración de festivais que axuden a potenciar o sector
cultural, manter o emprego, e a reactivar a
economía dos concellos onde se celebren. O deputado de Promoción Económica,
Blas García, presentou hoxe, acompañado do xefe do servizo de Promoción
Económica, Rafael Díaz-Aguado, esta nova liña de
axudas, que conta cun orzamento de 120.000 euros.
García explicou que
o sector vén de padecer unha crise económica derivada da pandemia que impediu
exercer a súa actividade con normalidade. “Unha situación que fixo que moitas
familias do sector cultural vivisen unha situación complicada”. “Moitos axentes
do sector se dirixiron a nós para
colaborar con eles e, tras analizar esta posibilidade, puxemos en marcha estas
axudas nun contexto, ademais, de inestabilidade económica cun incremento de prezos
importante. Por iso decidimos sacar esta axuda a través da área de Promoción Económica
da Deputación”, apuntou o deputado.
Destacou o gran
impacto económico que teñen estes festivais para os concellos onde se realizan.
“Milleiros de persoas acoden a eles e deixan un beneficio económico importante
en todos os sectores, o que redunda na reactivación económica e na creación do
emprego local”, explicou. Segundo García, as entidades poderán optar en
concorrencia competitiva a un máximo de 24.000 euros e o importe total das
axudas públicas concedidas para o mesmo obxecto non pode superar o 80% do
orzamento de gastos.
Poderán optar á subvención aqueles festivais musicais con
identificación e marca propia e recoñecible, programación diversa que aglutine
diferentes propostas artísticas, organizado periodicamente, con data de
celebración consolidada e orientada á consecución de públicos amplos ao redor
dunha proposta de contidos coherente e definida.
García lembrou as diferentes liñas de axudas que puxo en
marcha a Deputación co fin de apoiar a estes eventos como “revulsivo
económico tras dous anos de pandemia nos que non puideron celebrarse festivais
por mor das restricións sanitarias. Trátase de potenciar eventos que fortalecen
o tecido cultural da provincia e que exercen tamén un efecto multiplicador na
economía local en sectores como o hoteleiro, hostaleiro, comercial, transporte
ou empresas de servizos”. Trátase, en definitiva, de contribuír á difusión da
cultura galega e apostar pola creación cultural a través de plataformas de
promoción das propostas existentes e tamén de creación de emprego e riqueza,
como motor económico no eido local.
“A nosa intención é consolidar esta convocatoria. Este é
un primeiro paso para ir xerando unha identidade propia que englobe aos
festivais da provincia da Coruña,moitos deles referencia no seu sector”,
indicou o deputado, que sinalou como exemplos o WOS Son de Santiago, o Fisterra
Blues, o Maré Fest ou Fanzine Fest da Coruña.
A Deputación destinará 120.000 euros, aínda que poderá
ampliar a contía máxima dos créditos dispoñibles para esta convocatoria no caso
de existir crédito adecuado e suficiente.
Haberá unha comisión de valoración
formada por técnicos e expertos no sector que avalíen as propostas co fin de
comezar a prestar canto antes estas axudas, que xa se poden solicitar desde a
súa publicación o pasado mércores 22 de xuño.
A Deputación xa destinou máis de medio millón en 2022
Exemplo desta política de apoio ao sector cultural e de
reactivación económica é o aumento das axudas a concellos para a celebración de
festivais.
En 2022, a Deputación destinará 549.993,17 euros
dedicados a subvencionar máis dunha vintena de mostras audiovisuais, musicais e
de artes escénicas promovidos por concellos e por colectivos sociais de toda a
provincia durante este ano. En 2021, e a pesar da situación de restricións
sanitarias provocadas pola pandemia a Deputación destinou 474.277 euros e
accederon a esta liña de subvencións 23 eventos deste tipo. Departamento de comunicación