ARZÚA
O BNG require a protección, conservación e posta en valor do xacemento de arqueolóxico de Vilantime en Arzúa
MADRID | O deputado do BNG no Congreso, Néstor Rego, vén de
rexistrar iniciativas para a conservación e posta en valor dos restos
arqueolóxicos situados na proximidade do lugar de Vilantime encontrados durante
as obras da A-54. A organización nacionalista demanda ao Ministerio de
Transportes que adopte todas as medidas necesarias, en colaboración e
coordinación coa Xunta de Galiza e o Concello de Arzúa, para conservar o
complexo arqueolóxico e que asegure o depósito das pezas achadas nun museo
público galego próximo ao lugar da escavación para a súa exposición, así como
levar a cabo un proceso de musealización da zona.
Durante
a execución das obras da autovía A-54 que une a cidade de Santiago de
Compostela e Lugo, foi localizado un xacemento arqueolóxico de gran importancia
para a investigación histórica da Galiza e, especialmente, para a comarca de
Arzúa. Segundo os datos achegados pola equipa arqueolóxica encargada da
escavación, os restos son dunha aldea castrexa da época galaico-romana de 2.000
anos de antigüidade.
A área
arqueolóxica actual ten uns dous mil metros cadrados aproximadamente, mais os
encargados do estudo apuntan a que o xacemento supera a zona escavada polo
momento situada nos terreos expropiados para a construción da autovía. Así por
exemplo, a escasos metros da escavación actual, hai meses que a mesma empresa
arqueolóxica atopou varios restos de edificacións circulares de época
calcolítica, datadas entre os anos 1.700 e 3.000 a.C.
“Foi
achada unha zona cunha vivenda de catro estancias e outra construción destinada
á produción de pan a nivel industrial onde apareceron restos dun forno e varios
muíños de man” explica o deputado do BNG. Nunha zona lindeira, escaváronse dous
fornos de 2x2 metros para a cocción de ladrillo e tella romana, únicos na
Galiza polo seu formidábel estado de conservación. Na vivenda apareceron restos
de cerámica, tanto romana como propia da Galiza, así como varias moedas -entre
elas, unha do 114 d.C. do emperador Traxano e outra de finais do século III do
emperador Galiano- que permiten facer unha aproximación das datas de ocupación.
O
conxunto está situado ademais a escasos metros dun antigo camiño que comunicaba
Arzúa e Sardecoiro (Santiso) pasando por Maroxo, Montelongo e Pela, do que se
ten referencias documentais do s. X, que xunto co resto de achados, podería
formar parte da posta en valor da historia do lugar.
“Trátase
dun xacemento único na Galiza que debe ser conservado para o seu estudo e posta
en valor. Mesmo entendemos que hai que ampliar a zona escavada porque os
investigacións demostran que o complexo arqueolóxico é máis grande” destaca
Rego. Neste sentido, o deputado do BNG considera que o Ministerio de
Transportes, Mobilidade e Axenda Urbana debe ter un papel determinante, por ser
a Administración responsable das obras de construción da A-54, na protección, consolidación
e posta en valor do complexo.
Do
mesmo modo, o BNG demanda a coordinación entre as diferentes administracións
-Estado, Xunta e Concello de Arzúa- para asegurar esta protección e posta en
valor posterior a través dunha musealización da zona ou a creación dun centro
de interpretación que permita coñecer a historia e importancia dos achados. “Ademais,
reclamamos que se depositen todas as pezas encontradas na excavación nun museo
público galego próximo ao lugar de escavación para a súa exposición, pois son
parte do patrimonio histórico e cultural da Galiza” destaca finalmente o
deputado do BNG no Congreso. Departamento de comunicación