GALICIA | POLÍTICA
Formoso: "O sistema sanitario galego está en risco, porque o PP ten intención de desmantelalo"
SANTIAGO DE COMPOSTELA | O secretario xeral do PSdeG, Valentín González Formoso, pediu a Rueda “que escoite menos Radio María” e deixe de apoiar o protocolo de coacción ás mulleres que deciden interromper o seu embarazo aprobadas polo goberno de PP e VOX en Castela e León.
O líder dos socialistas galegos amosou a súa indignación co apoio do presidente da Xunta ás medidas que coaccionan e intimidan ás mulleres que deciden abortar, anunciadas a semana pasada polo vicepresidente do goberno de coalición dos populares coa formación de ultradereita en Castela e León, criticadas por colectivos médicos e feministas, así como por gran parte da sociedade.
Valentín González Formoso denuncia que Rueda “está máis á dereita” que o propio Mañueco, que xa recoñeceu que se poden vulnerar os dereitos das mulleres coas prácticas propostas polo seu goberno. Por iso esixiulle ao presidente galego que “lle explique a cada muller galega que non ten capacidade para decidir sobre o seu propio corpo”.
A pesar da recuperación deste debate, o secretario xeral dos socialistas recordou que “chove sobre mollado” no relativo ao PP galego, xa que a primeira medida lexislativa promovida polo goberno de Feijóo ao chegar á Xunta no ano 2009 foi aprobar unha iniciativa popular para financiar con fondos públicos á entidade antiabortista Red Madre. E a primeira decisión que tomou máis recentemente como presidente do Partido Popular foi votar no Senado contra a norma que impide acosar ás mulleres que deciden interromper o embarazo.
Para o número un dos socialistas galegos, Rueda e Feijóo están influídos pola corrente de ultradereita a nivel mundial, seguindo os pasos do “Trumpismo e do Bolsonarismo” para facer que Galicia “viva nun pasado enraizado aínda no PP”, pero cre que a sociedade galega “vai por outro lado” cara a posicións moito máis “progresistas”.
Sanidade pública
A rolda de prensa do socialistas foi convocada tras unha reunión con representantes da plataforma SOS Sanidade Pública, con motivo de impulsar a manifestación que terá lugar en Santiago de Compostela o vindeiro 12 de febreiro con motivo do deterioro constante do sistema sanitario galego ata chegar a un punto que ambas organización considera crítico.
Valentín González Formoso chamou a “encher as rúas” para mandar un mensaxe claro ao goberno galego de que a cidadanía quere defender a súa sanidade pública, xa queentende que o sistema sanitario galego “está en risco” porque o PP ten intención de desmantelalo, polo que “teñen que ver que hai partidos, organizacións e unha sociedade en fronte”.
Manuel Martín, voceiro de SOS Sanidade Pública, agradeceu a Formoso e ao PSdeG o seu apoio ao traballo da plataforma. Amosou duras críticas á xestión sanitaria do executivo galego, especialmente ante a falta de medidas para paliar a falta de persoal sanitario que está poñendo en serio risco o mantemento dos centros de atención primaria e a saúde dos galegos e galegas. Departamento de comunicación