GALICIA
A agricultura 4.0, unha revolución que gaña protagonismo na exposición e actividades da feira Abanca Cimag-GandAgro
REDACCIÓN | A IV Feira Profesional de Maquinaria, Agricultura e Gandería, Abanca Cimag-GandAgro 2023, será do 2 ao 4 de marzo unha cita referente en innovación agropecuaria. E con esta premisa, terá un gran protagonismo a agricultura 4.0, centrada na dixitalización dos procesos agrícola, coa tecnoloxía dixital como aliada para que estes sexan máis produtivos, autónomos, eficaces e sostibles. Así, ademais de estar moi presente na oferta expositiva do certame, tamén centrará xornadas técnicas e demostracións.
En canto ás primeiras, a Fundación Empresa-Universidade Galega (FEUGA), levará a cabo a conferencia “Agricultura de precisión con millo forraxeiro en Galicia”, no que se expoñerá o desenvolvemento que o grupo operativo Galicia Millopreciso busca desta técnica, a cal permite unha xestión máis eficiente dos recursos agrícolas, mellorando a calidade dos cultivos mediante a análise de datos recolleitos durante todo o seu ciclo produtivo. Este proxecto, que permitirá optimizar a elaboración de prescricións para realizar aplicacións a doses variables de sementes e fertilizantes no cultivo do millo forraxeiro, será exposto por Ánxela Montero, responsable da Unidade de Xestión de Proxectos Europeos e xestora senior en Innovación e Proxectos Nacionais de FEUGA, e por Javier Bueno, investigador do Grupo BioMODEM da Universidade de Santiago de Compostela (USC).
Ademais, a xornada sobre agricultura 4.0 de Claas Ibérica debullará a telemetría e “telematics”, o Isobus, os sistemas de información de xestión agrícola “365 Farm Net” e os sistemas GPS. Os encargados de dar a coñecer todos estes aspectos serán Fernando Igualador, responsable de produto de Maquinaria de Recolección e EASY de Claas Ibérica, e Vicente Minaya, inspector de servizo da marca. Así mesmo, un representante de Agrícola Noroeste-John Deere conducirá a xornada “Documentación e Agricultura de Precisión”.
Demostracións
Os asistentes a Abanca Cimag-GandAgro 2023 tamén poderán comprobar en vivo en que consiste a agricultura intelixente. Así, Agrícola Noroeste-John Deere levará a cabo demostracións de sincronización de máquinas. Pola súa banda, a empresa Claas Ibérica realizará unha exhibición de autoguiado con terminal Isobus. Departamento de comunicación