GALICIA | POLÍTICA
Alfonso Rueda reunirase coa presidenta da Comisión Europea o próximo luns 27 en Bruxelas
Será o primeiro presidente dunha Comunidade autónoma española que manteña un encontro institucional con Ursula von der Leyen.
SANTIAGO DE COMPOSTELA | A presidenta da Comisión Europea, Ursula von der Leyen, recibirá o presidente da Xunta, Alfonso Rueda, para abordar asuntos prioritarios para o presente e o futuro de Galicia. O encontro terá lugar o vindeiro 27 de marzo na sede da Comisión Europea, en Bruxelas.
Alfonso Rueda será o primeiro presidente dunha Comunidade autónoma española que manteña un encontro institucional coa máxima representante dunha das principais institucións da UE.
A Comisión Europea é o órgano executivo, politicamente independente, da UE. É a única instancia responsable de elaborar propostas de nova lexislación europea e de aplicar as decisións do Parlamento Europeo e do Consello da UE.
Entre os asuntos que Rueda lle trasladará a Von der Leyen figuran nun lugar preferente o futuro da pesca galega e a xestión dos fondos europeos, entre outras cuestións nas que a Comisión Europea disporá de primeira man do posicionamento da Xunta.