COMEDIA GALEGA
A nova comedia galega que mestura os Monty Python e a cultura "drag"
REDACCIÓN | Unha produtora audiovisual viguesa abre un crowdfunding para poder financiar un cinema irreverente co que crear espazos de identificación para as persoas que a industria deixa fóraOs Delirio Sketchs son cinco capítulos cargados de intensidade e humor febril nos que se abordan desde o surrealismo diferentes problemáticas que afectan á nosa sociedade.
Recoller o máis surrealista e febril da sociedade galega para transformalo en humor audiovisual. É posible mesturar musicais protagonizados por drags galegas con escenas do costumbrismo galego? Xuntar nun mesmo concepto anuncios publicitarios de realidades paralelas con coreografías da elite underground do país? Soa delirante. Xusto por iso, CRU Producións decidiu poñerlle por nome a esta serie de comedia Delirio Sketchs. Non enganan a ninguén. O tráiler que veñen de publicar co lanzamento da súa campaña de mecenado xa é toda unha declaración de intencións. De onde veñen e cara onde van. “Creamos un espazo de identificación. Un lugar onde atoparnos como persoas galegas desde o entretemento”, explican dende a produtora sinalando a unha industria que parece non querer deixar oco ás identidades non normativas.
Delirio Sketchs é unha serie de humor de cinco capítulos cargados de intensidade e comedia febril nos que se abordan, desde o surrealismo, diferentes problemáticas que afectan á nosa sociedade. “Conteñen múltiples temáticas que son as que se corresponden coas diferentes cosmovisións deste lado do planeta”, engaden dende CRU Producións. Nese lado do planeta está, por exemplo, o propio grupo de profesionais que levará a cabo a rodaxe. Todo o equipo técnico e artístico forma un mesmo lugar de cultura, que “ten as mesmas características variadas e diversas que as do público”. “Creamos un espazo de identificación, un lugar onde atoparnos como persoas galegas desde o humor e o entretemento”, recalcan.
Nesta nova serie que comezará a producirse este ano están chamadas a participar diferentes persoas importantes da cultura galega dixital, pop e underground que consideran que merecen unha representación audiovisual á que non sempre poden acceder. Delirio Sketchs funciona como parte dun todo e son diferentes espellos do calidoscopio que é a nosa realidade como persoas galegas. Diferentes xanelas de conflito en clave de humor representadas por irreverentes sketchs. Departamento de comunicación