GALICIA | POLÍTICA
O socialista César Mogo defenderá no Senado o apoio da Cámara Alta ao recoñecemento do Estado de Palestina
REDACCIÓN | O Grupo Socialista defenderá o martes na Comisión de Asuntos Exteriores unha moción na que pedirá ao Senado que apoie o recoñecemento de Palestina como Estado, na liña de acción diplomática emprendida polo presidente do Goberno, Pedro Sánchez.
O portavoz adxunto do PSOE na Cámara Alta e senador por Lugo, César Mogo, explicou que “o Grupo Socialista quere que o Senado se una á decisión do Goberno máis transcendente en materia de política exterior das últimas décadas, expresando o seu respaldo político ao recoñecemento do Estado de Palestina”, e engadiu que “a xustiza e a paz son sinais deste recoñecemento exemplar”.
Na mesma moción, os socialistas expresan a súa “máis contundente condena” aos atentados terroristas perpetrados por Hamás o pasado 7 de outubro e esixen a liberación inmediata das persoas secuestradas.
Ademais, manifestan o seu rexeitamento ás operacións militares que se están levando a cabo en Gaza e que se están cobrando milleiros de vidas, e reivindican a vixencia do dereito internacional humanitario.
Os senadores socialistas expresan o seu apoio aos esforzos encamiñados á busca dunha saída pacífica ao conflito, que debe pasar necesariamente polo alto o fogo, a apertura dun proceso de diálogo e o recoñecemento dos dous estados.
Por último, apoian as xestións emprendidas polo secretario xeral da ONU para poñer fin ao conflito e secundan a proposta do Goberno para convocar unha conferencia de paz que faga posible un espazo para a negociación, o entendemento e a materialización da solución dos dous estados. Departamento de comunicación