DEPUTACIÓN DA CORUÑA
Regina Giménez gaña o XX Premio Internacional Jesús Núñez de arte gráfica coa obra "Pensar un paisaje"
REDACCIÓN | A barcelonesa Regina Giménez é a gañadora do XX Premio Internacional Jesús Núñez de arte gráfica con “Pensar un paisaje”, una obra que, segundo o xurado “destaca pola súa frescura no uso da cor, combinando formas ludicamente sinxelas, pero de alta complexidade conceptual e simbólica”. Os dous accésits, para bolsas de formación nun curso do Máster sobre obra gráfica, recaeron en Pawel Delekta, pola obra “Lapidarum III”, e Tomás Pariente, por “Stripsafter Richter. r XVIII”.
A deputada de cultura, Natividade González, presidiu o xurado, que se reuniu na sede de Fundación CIEC, Centro Internacional da Estampa Contemporánea, en Betanzos, e que formaron José Andrés Santiago Iglesias, José María Luna Aguilar, João Rosa Guerra Prates, Antonia Fraga Lombardero e María Rosario Sarmiento Escalona. Como secretaria actuou Manuela Lorenzo Rodríguez, xefa a sección de Educación e Cultura.
Tamén estiveron presentes, sen voz nin voto, Pedro González Galilea, director da Fundación e comisario do certame; María Sánchez Pena, administrativa da Fundación, e Marcos Sánchez, da empresa A Forxa Producións, coordinadora dos premios e certames convocados. Natividade González agradeceu a colaboración de todos os asistentes e destacou a calidade e o número de obras presentadas 206, “o que fala da importancia e do impacto que ten o premio no ámbito internacional da arte gráfica”.
Pedro González Galilea manifestou o agradecemento á Deputación por manter o Premio desde o ano 2006 de xeito ininterrompido, “conseguindo que sexa un referente no campo da obra gráfica”. Salientou tamén “a importancia de que se faga un catálogo das obras que compoñen a exposición itinerante do certame, xa que moitos outros limítanse a un premio e, neste caso, queda o catálogo como referente”.