DEPUTACIÓN DA CORUÑA
A Deputación apoia ao Rallye de Ferrol
REDACCIÓN | O Concello de Ferrol acolleu hoxe a presentación oficial do 56º Rallye de Ferrol, unha das citas máis emblemáticas do automobilismo galego, que se celebrará esta fin de semana, os días 22 e 23 de agosto, coa participación de 125 pilotos.
No acto participaron o deputado de Deportes da Deputación da Coruña, Antonio Leira, o alcalde de Ferrol, José Manuel Rey Varela, o presidente da Escudería Ferrol, Germán Castrillón, e a secretaria territorial da Xunta en Ferrol, Patricia Busto.
Durante a súa intervención, Antonio Leira destacou que o Rallye de Ferrol “é moito máis ca unha carreira: é un evento de país, que mobiliza recursos, persoas e emocións, e que proxecta o nome de Ferrol e da súa comarca máis alá das nosas fronteiras”.
O deputado puxo en valor o traballo da Escudería Ferrol, organizadora do evento, “un exemplo de como a paixón polo deporte, cando se combina con capacidade organizativa e apoio institucional, pode dar lugar a eventos desta dimensión”.
Leira subliñou tamén o compromiso da Deputación co deporte como motor de desenvolvemento local, como ferramenta de cohesión social{/strong} e como vía para promocionar o territorio{/strong}. “Detrás de cada coche hai un equipo, un taller, unha familia, un concello implicado. Eventos coma este son claves para manter vivo o tecido deportivo da provincia”, afirmou.
A Deputación da Coruña leva anos apoiando o Rallye de Ferrol e, segundo indicou Leira, continuará facéndoo “apostando non só polos grandes eventos, senón tamén polo traballo de base, polas escudarías, polos clubs e por todas as persoas voluntarias que fan posible que o rallye sexa un éxito cada ano”.
Ademais do seu valor deportivo, o deputado salientou o impacto económico positivo que o rallye ten para Ferrol e a súa contorna, con repercusión directa na hostalería, o comercio, os servizos e a ocupación hoteleira.
O Rallye de Ferrol 2025 desenvolverase en dúas xornadas: o venres 22 coa cerimonia de saída e o tramo de probas (shakedown), e o sábado 23 cunha intensa xornada competitiva que arrancará ás 08:00 horas e incluirá máis de 97 km cronometrados sobre asfalto, repartidos en varios tramos polas comarcas de Ferrolterra e arredores.