DEPUTACIÓN DE PONTEVEDRA
Máis de 100.000 euros entre 22 entidades xuvenís de 14 concellos da provincia no marco do Plan +Xuventude
REDACCIÓN | O presidente da Deputación de Pontevedra, Luis López, anunciou hoxe que a Xunta de Goberno da institución provincial acaba de dar luz verde ao reparto de preto de 102.000 euros no marco do Plan +Xuventude, a primeira liña de achegas da entidade dirixida expresamente á mocidade. Nesta segunda convocatoria resultaron beneficiarias 22 entidades xuvenís de 14 concellos da provincia, que a Deputación apoia “para impulsar iniciativas de interese social e impulsar proxectos de interese social relacionadas coa cultura, o deporte, a música ou vencelladas á natureza”.
Na contorna de Pontevedra reciben recursos colectivos de Barro (Asociación Cultura e Xuventude Barro, “Feito a man”; Asociación Cultural Colectivo Espazo 16, “Laboratorio da Paisaxe Baixo Miño”; e Asociación Musical Cultural Tirante, “Barosa Líquida”, 5.000 € cada un), de Cerdedo-Cotobade (Sara Troitiño, “Camiñando pola natureza”, 5.000 €) e de Pontevedra (Down Pontevedra, “Percorrendo a tradición”, 5.000 €). Na comarca do Salnés, resultaron beneficiarias dúas asociacións de Vilagarcía de Arousa (Asociación Arousa Moza, “Obradoiros Semente de Futuro”) e Vilanova de Arousa (Asociación Conecta Galicia, “Conecta + Xuventude”) con 5.000 € cada unha.
No caso de Deza e Tabeirós-Terra de Montes, os recursos do +Xuventude chegan á Estrada (Asociación Xuvenil Imaxe e Axuda, “Acción de noite”, 5.000 €) e Silleda (Asociación Cultural Banda de Música de Silleda, “Campamento musical de verán”, 4.750 €). Na comarca do Morrazo, resultou beneficiario un colectivo de Bueu (Asociación Recreativa e Cultural Marexada, “Centinelas da auga”) que recibirá 5.000 €.
No sur da provincia, reciben recursos asociacións da Guarda (Érguete, “Non o deixes ao azar”, 5.000 €), O Rosal (Agrupación Musical do Rosal, “Máis que música”, 5.000 €), Salceda de Caselas (Asociación Xuvenil de Parderrubias Festas de Santo Amaro, “O legado dunha xeración”, 4.873 €), Salvaterra de Miño (Asociación Non Damos Feito, “Galimpiadas”, 4.666 €) e Tui (Banda de Música Popular de Tui, “Sons e Emocións: a cultura da mocidade”, 4.399 €).
No caso da cidade de Vigo, son sete as asociacións beneficiarias (Centro Cultural Artístico e Recreativo de Valladares, “Campamento musical Okupémonos”, 5.000 €; Centro Xuvenil Abertal, “Outra movida”, 5.000 €; Clean Energy Ship UVigo, “Creación de consellos locais de xuventude e fomento do asociacionismo e voluntariado xuvenil”, 1.000 €; Asociación Cultural Galicia Fiddle, “Fiddle para as aldeas”, 4.434 €; Asociación Xuvenil Xuntanza Xuvenil, “Suando a camisola”, 2.900 €; Asociación Nós Mesmas, “Somos hype”, 4.567 €; e Down Vigo, “Cultura tradicional e inclusiva”, 5.000 €).
O presidente, que lembrou que esta nova convocatoria do Plan +Xuventude está dotada dun 20% máis de recursos fronte á primeira edición, sinalou o “grande éxito” desta iniciativa, no marco da “aposta que estamos facendo pola xuventude desde o noso goberno, como nunca antes na historia desta institución”.