DEPUTACIÓN DA CORUÑA
A Deputación e a CEC financian con 280.000 euros o proxecto "Impulsa Coruña"
Para fomentar o emprendemento en toda a provincia.
REDACCIÓN | A Deputación da Coruña e a Confederación de Empresarios da Coruña financian con 280.000 euros o proxecto “Impulsa Coruña”, unha iniciativa destinada a fomentar o emprendemento e fortalecer a actividade empresarial na provincia. O programa desenvolverase a través dun convenio de colaboración asinado hoxe entre o presidente provincial, Valentín González Formoso e presidente da CEC, Antonio Fontenla, nun acto ao que tamén asistiu a deputada de Emprego e Industria, Rosa Ana García. A achega provincial ascende a 224.000 euros (o 80% do total) e aportación da CEC será de 56.000 euros (20%).
Valentín González Formoso, destacou que este proxecto forma parte da estratexia da institución para impulsar o emprendemento na provincia. “Desde a Deputación temos claro que apoiar a quen decide emprender é apostar polo futuro da provincia. Queremos crear oportunidades para que as boas ideas poidan converterse en proxectos empresariais sólidos que xeren emprego e actividade económica nos nosos concellos”, afirmou.
O presidente da Confederación de Empresarios da Coruña (CEC), Antonio Fontenla, agradeceu á Deputación o seu importante apoio para o desenvolvemento do programa ‘e asegurou que “esta colaboración representa un paso fundamental para seguir impulsando o emprendemento”.
Fontenla destacou que “o emprendemento está a calar cada vez máis como unha opción de futuro, especialmente entre as xeracións máis novas, o que nos anima a perseverar nas iniciativas de apoio e a ofrecer o acompañamento necesario para converter esas ideas en empresas viables”.
Ademais, asegurou que “o respaldo ao emprendemento no rural é clave para xerar oportunidades, dinamizar a economía local e contribuír a fixar poboación nas nosas comarcas”. Segundo explicou, “un rural con economía é un rural con futuro, e este proxecto busca que o desenvolvemento chegue de maneira equilibrada tanto ás áreas urbanas da Coruña e Ferrol como a comarcas estratéxicas como Bergantiños, Terra de Soneira, Fisterra, Ordes, As Mariñas, Eume e Ortegal, reforzando así o desenvolvemento económico sostible en toda a provincia”.
Entre as actuacións previstas inclúense programas de formación e capacitación adaptados ás demandas reais do mercado laboral, procesos de mentorización e acompañamento para persoas emprendedoras, así como iniciativas destinadas a facilitar o acceso ao financiamento para novos proxectos empresariais.
O obxectivo é impulsar iniciativas empresariais viables e favorecer especialmente o crecemento de pemes, micropemes e persoas autónomas, contribuíndo á dinamización económica das diferentes comarcas da provincia.
Estratexia provincial de apoio ao emprendemento
O proxecto “Impulsa Coruña” forma parte dunha estratexia máis ampla da Deputación para apoiar a creación de empresas e o autoemprego como ferramentas clave para xerar riqueza e oportunidades, especialmente nos concellos máis pequenos.
Neste marco, a institución provincial colabora tamén coa Cámara de Comercio de Santiago de Compostela no programa Provincia Emprendedora, que desde maio de 2025 desenvolveu 50 sesións de fomento do espírito emprendedor no ámbito educativo, nas que participaron máis de 700 persoas.
Ademais, o programa prestou asesoramento a 68 proxectos emprendedores, con 83 persoas promotoras implicadas e máis de 450 asistencias realizadas. Como resultado deste acompañamento, 43 persoas emprendedoras déronse de alta na Seguridade Social, ben como empresarios individuais ou formando parte de sociedades.
Esta colaboración complétase co Coworking Dixital Compostela, integrado na Rede Provincial de Coworking, creada en 2019 no marco do Plan de Emprego Local (PEL) e que conta actualmente con 12 espazos de traballo colaborativo na provincia.
Máis de 7.700 empregos creados a través do PEL
O apoio ao emprendemento e á actividade empresarial é unha das liñas estratéxicas da Deputación da Coruña a través do Plan de Emprego Local (PEL), que desde a súa posta en marcha hai unha década se converteu nunha das principais ferramentas de promoción do emprego na provincia.
Neste período, o programa permitiu crear máis de 7.700 empregos, ademais de beneficiar a 2.700 pequenas empresas e apoiar a máis de 4.000 persoas autónomas mediante bonificacións na cota da Seguridade Social.
Os datos máis recentes confirman a consolidación deste programa. En 2026, a liña PEL-Concellos destina 3,5 millóns de euros para contratar máis de 400 persoas desempregadas en 90 dos 93 concellos da provincia. Ademais, as axudas do PEL mobilizaron 4,7 millóns de euros, permitindo crear ou consolidar 430 postos de traballo en pequenas empresas.
Formoso subliñou que estes programas reflicten o compromiso da Deputación coa economía produtiva da provincia: “Queremos seguir creando oportunidades para que as empresas medren, para que máis persoas poidan emprender e para que o talento non teña que marchar fóra da nosa terra”.
A través destas iniciativas, a Deputación da Coruña continúa impulsando políticas orientadas a fomentar o emprego estable e de calidade, apoiar o emprendemento e fortalecer o tecido económico local, contribuíndo tamén a fixar poboación no rural e afrontar o reto demográfico.