XXXV MOSTRA DO ENCAIXE DE CAMARIÑAS
Gubem Event volverá encargarse da pasarela da Mostra do Encaixe de Camariñas
REDACCIÓN | A pasarela da XXXV Mostra do Encaixe de Camariñas Deputación da Coruña está a destacarse como unha referencia nacional a nivel organizativo e de proposta visual, presentando desfiles estruturados, dinámicos e entretidos para o público, tanto para o máis experto como para os que se achegan por primeira vez ao mundo da moda.
A empresa galega Gubem Event será, un ano máis, a responsable da organización e coordinación da pasarela da Mostra do Encaixe de Camariñas, consolidando así o seu papel nun dos eventos máis relevantes do calendario da moda en Galicia.
Á fronte da empresa atópase o modelo internacional Damián Álvarez, quen lidera un proxecto que combina experiencia no sector da moda e capacidade organizativa, aportando unha visión profesional e actual á posta en escena dos desfiles.
Dende a chegada de Gubem Event á coordinación da pasarela, a Mostra experimentou un notable aumento de afluencia de público, reflexo dun formato máis dinámico, atractivo e adaptado ás novas tendencias do sector.
“Apostamos por unha coidada selección de modelos, incorporando perfís diversos e de gran interese, así como por uns constantes cambios de coreografías e da estrutura dos desfiles. O obxectivo é ofrecer unha pasarela viva, variada e sorprendente, onde cada pase se converta nun auténtico espectáculo”, explica Damián.
Para esta nova edición, Gubem Event adianta que haberá novidades que reforzarán a experiencia do público e seguirán posicionando a Mostra do Encaixe de Camariñas como un referente que combina tradición e moda contemporánea.