ARTEIXO
Fin de semana de actividades mariñeiras no Centro Mar de Sorrizo de Arteixo
REDACCIÓN | Esta fin de semana -o 20 e 21 de xuño- continúa o programa de actividades mariñeiras en Mar de Sorrizo. A iniciativa, promovida polo Concello e financiada polo GALP, Golfo Ártabro Sur, a Consellería do Mar e os Fondos FEMPA (Fondo Europeo Marítimo da Pesca e da Acuicultura), presenta esta fin de semana dúas propostas, o “Obradoiro de lixo mariño” o sábado de 16:30 a 19:00 horas e dobre sesión da ruta “Biodiversidade”, que poderá facerse tanto o sábado ás 11:00 horas como o domingo ás 17:00, con duración de hora e media.
A través deste ciclo, o Concello aposta novamente pola educación ambiental e o coñecemento da costa mediante actividades relacionadas coa conservación dos ecosistemas mariños, a xestión de residuos, o aproveitamento creativo do lixo mariño e a creación de experiencias ecoturísticas sostibles.
A primeira actividade, constará dun obradoiro práctico no que os asistentes poderán achegarse á problemática do lixo mariño para comprender de onde proceden os residuos, cómo se xestionan e qué cambios podemos introducir no noso día a día para reducir a súa pegada ambiental.
Dirixida a persoas cun interese e compromiso polo medio ambiente e con vontade por coñecer mellor o problema que supón o lixo mariño, os asistentes poderán contar, ao finalizar o taller, con ferramentas prácticas para combatelo dende a vida cotiá.
Na ruta, poderás descubrir o litoral arteixán cun percorrido que parte da praia Alba-Rañal, visitar o monumento ao Voyeur (Vixiador) - un mirador privilexiado sobre o Atlántico e punto de referencia fotográfico - pasando polas praias de Repibelo, A Salsa e Valcobo, o mirador xunto ao Illote da Herbosa e o paseo fluvial do río Bolaños para voltar ao punto de saída.
A andaina é un percorrido de 5,10 km. cunha dificultade fácil, accesible para calquera que desexe coñecer mellor a zona que rodea o Centro Sorrizo, que percorrerase en, aproximadamente hora e media.
O prazo de inscripción está aberto e pecha 48 horas antes do comezo da actividade correspondente. A inscripción é de balde e realízase na páxina de Turismo do Concello.