A CORUÑA
Inés Rey reivindica a maior implicación dos servizos públicos no Día Mundial do Alzhéimer
REDACCIÓN | A alcaldesa, Inés Rey, participou hoxe, acompañada da concelleira de Benestar Social, Participación e Igualdade, Nereida Canosa, e o concelleiro de Infraestruturas, Jesús Celemín, na lectura do manifesto do Día Mundial do Alzheimer. O acto, que tivo lugar fronte á igrexa de San Andrés, contou tamén coa presenza doutros membros da corporación municipal, da deputada provincial Silvia Longueira e da Asociación de Familiares de Enfermos de Alzheimer (AFACO), representada pola súa tesoureira, Inés Hervada Vidal. Xunto coa lectura procedeuse á inauguración dun novo banco na zona conmemorando os pacientes e quen fan todo por coidalos.
No encontro, a alcaldesa reivindicou a importancia social dos coidados dentro e fóra do ámbito familiar e a loita por mellorar a calidade de vida dos pacientes da enfermidade coa colaboración das institucións e o investimento de recursos públicos non só na asistencia persoal senon tamén na investigación para achar tratamentos que atrasen o máximo posible o avance dos efectos.
“O alzhéimer é unha realidade dolorosa para moitísimas familias. E é unha realidade da que ninguén está a salvo. Aínda non podemos facelo desaparecer. Pero hai algo que si podemos facer: acompañar, coidar, estar e coller a man da persoa que se afasta”, apuntou Inés Rey.
Ademais, Rey tamén recordou que o Concello inviste máis de 10 millóns de euros anuais á atención das persoas maiores e en situación de dependencia, garantindo asistencia e unha vida digna a centos de veciños e veciñas, e reivindicou “o traballo dos profesionais que coidan con dedicación de quen o precisa”.
No ámbito dos recursos públicos e a colaboración co tecido asociativo, Rey lembro que “o Concello mantén con AFACO desde fai anos un convenio para financiar o servizo de respiro familiar e o apoio á promoción da autonomía das persoas afectadas pola enfermidade de Alzhéimer. É o apoio concreto para que as familias non afronten soas os coidados e para que as persoas afectadas poidan manter a súa autonomía durante o maior tempo posible”.
O texto do manifesto reivindica o reforzo das axudas os coidados e a investigación, ademais da mellora das condicións dos traballadores e traballadoras que coidan dos pacientes, ademais de garantir o principio de equidade no acceso a recursos e tratamentos para que o factor económico non sexa un impedimento para poder convivir de forma digna coa enfermidade.