A CORUÑA | PONTEVEDRA
A Coruña e Pontevedra acollerán o regreso de "As Cigarreiras"
Reivindica a memoria obreira das mulleres da Fábrica de Tabacos.
REDACCIÓN | A alcaldesa da Coruña, Inés Rey, participou hoxe na presentación da xira galega de ‘As Cigarreiras’, o grande espectáculo musical e teatral promovido pola Banda Municipal de Música da Coruña e Cántigas da Terra, que se representará no Palacio da Ópera o vindeiro 19 de novembro antes da súa estrea no Pazo da Cultura de Pontevedra o día 26, dentro da programación de Culturgal. No acto tamén estiveron presentes Juan Miguel Romero Llopis, director da Banda Municipal da Coruña; Luis Bolón, director musical de Cántigas da Terra; Camilo Franco, director de Culturgal; Isabel Risco, actriz protagonista do espectáculo; e Gonzalo Castro, concelleiro de Cultura e Turismo.
Tras o éxito da representación de ‘As Cigarreiras’ na Semana Clásica das Festas de María Pita 2025, a BMMC e Cántigas da Terra volven a colaborar nesta iniciativa que promove o Concello. A alcaldesa puxo en valor unha produción que recupera a memoria das traballadoras da Fábrica de Tabacos da Palloza e da revolta protagonizada polas cigarreiras en 1857, considerada unha das primeiras loitas sindicais lideradas por mulleres en Europa. “As Cigarreiras é un exemplo extraordinario de como a cultura nos permite recuperar a nosa historia e dar voz ás mulleres que contribuíron a construír a Coruña que hoxe coñecemos. Trátase dun espectáculo que emociona, que reivindica a nosa memoria colectiva e que proxecta a nosa identidade cultural cara ao futuro”, sinalou Rey.
A rexedora destacou tamén a colaboración entre dúas entidades de referencia na cidade. “A Banda Municipal leva décadas achegando a música clásica e contemporánea á cidadanía a través dunha programación de enorme calidade e cunha especial atención aos vínculos de Galicia co seu repertorio. É unha institución cultural imprescindible que contribúe ademocratizar o acceso á cultura e a formar novos públicos”, afirmou. Rey quixo recoñecer igualmente o labor de Cántigas da Terra, entidade que se atopa inmersa nunha nova edición do Ciclo de Coros Galegos.
“Estamos a falar dun referente cultural non só da Coruña senón de toda Galicia. A súa traxectoria centenaria na defensa e divulgación da lingua, da música, do baile e das tradicións galegas converteuna nunha institución fundamental para a preservación e transmisión da nosa cultura”, indicou.
Máis dun cento de artistas participan en As Cigarreiras, unha produción que combina música sinfónica, canto coral, teatro e danza para recrear a historia das traballadoras da antiga Fábrica de Tabacos. A proposta reúne sobre o escenario a Banda Municipal de Música da Coruña, o Coro Galego Cántigas da Terra e o Grupo de Baile Santaia, ademais dun destacado elenco interpretativo encabezado por Isabel Risco.
A obra recupera e actualiza o xénero da estampa galega para render homenaxe ás mulleres que protagonizaron a revolta do 7 de decembro de 1857, un episodio fundamental da historia social e laboral da cidade. A través da música, do teatro e da danza, o espectáculo percorre a historia da fábrica e das súas traballadoras, ao tempo que reivindica a memoria dun acontecemento clave para o movemento obreiro.
“A Coruña é unha cidade con talento, creatividade e unha rica tradición cultural. Proxectos como As Cigarreiras son a mellor demostración da capacidade das nosas entidades e profesionais para crear propostas innovadoras a partir do noso patrimonio e da nosa historia”, concluíu a alcaldesa.
Os convites para o espectáculo do Palacio da Ópera estarán dispoñibles a partir das 13.00 horas deste martes 20 de outubro en Ataquilla e no despacho de billetes da praza de Ourense. Cada persoa pode retirar ata cato convites.