Xornalistas e escritores galegos asinan un convenio de colaboración para promover un premio de xornalismo literario

O presidente do Pen Clube de Escritores de Galicia, Luís González Tosar, e o da Federación de Asociacións da Prensa de Galicia (FAPG), Manuel González, asinaron en Santiago un convenio de colaboración entre ambas organizacións. O acordo, de vixencia anual prorrogable, servirá para promover actividades conxuntas, como a creación dun premio de xornalismo literario ou a celebración dun coloquio anual arredor da problemática de xornalistas e creadores literarios. Ao tempo, pedirán á Administración que Galicia sexa "terra de asilo" para xornalistas e escritores presos ou perseguidos por defender a liberdade de expresión nos seus países. Para isto terase en conta informes de entidades de prestixio, como o comité internacional do Pen, Amnistía Internacional, Reporteiros sen Fronteiras e a Federación Internacional de Xornalistas.