Galicia acollerá unha mostra de cine inédito arxentino este ano

Touriño recibe ao actor arxentino de orixe galega Eduardo Blanco

Galicia acollerá antes de que remate o ano unha mostra de cine inédito arxentino. Así llo comunicou o presidente da Xunta, Emilio Pérez Touriño, ao actor arxentino de orixe galega Eduardo Blanco, con quen se reuniu en Santiago. O máximo mandatario galego coñeceu ao actor o ano pasado durante a súa viaxe a Arxentina, no marco do Festival Internacional de Cine de Mar de Plata, onde a Xunta e o Instituto de Cine Arxentino (Incaa) asinaron un convenio de colaboración para a promoción do cine galego. O actor de películas como "Luna de avellaneda" ou "Conversaciones con mamá" foi recibido na residencia presidencial de Monte Pío durante a viaxe que o reunirá coa súa familia. A xuntanza serviu para continuar unha liña de colaboración entre ambos países en materia audiovisual, un sector considerado "estratéxico" polo actual Executivo. Así, no 2005, o Consorcio Audiovisual de Galicia, o Instituto Catalá de les Indústries Culturais e o Instituto Nacional de Cine y Artes Audiovisuales de Arxentina (INCAA) subscribiron o acordo Raíces, para impulsar a coprodución de longametraxes cinematográficas con produtoras independentes dos países implicados. Deste xeito, foméntase a exhibición e o intercambio entre os produtos audiovisuais arxentinos e galegos como paso inicial para o desenvolvemento dun mercado común cinematográfico, informa a Xunta nun comunicado.