A Deputación da Coruña aposta por implantar servizos de Normalización Lingüística en todos os concellos

O responsable da área de Benestar Social, Políticas de Igualdade de Xénero e Normalización Lingüística da Deputación da Coruña, Xoán Manuel Sande, afirmou que a institución pretende implantar servizos de normalización lingüística en todos os concellos da provincia. Sande, que presentou o I Encontro de Política Lingüística desde as administracións locais de Galicia, que se celebrará no Pazo de Mariñán o vindeiro 28 de novembro, explicou que con esta iniciativa se trata de poñer en marcha estratexias de acción e coordinación para a promoción social do uso do galego nas administracións locais e deseñar conxuntamente liñas de cooperación e coordinación entre os concellos nesta materia. Xoán Manuel Sande destacou que as administracións públicas ?teñen a obriga e a responsabilidade? de promover políticas activas de normalización lingüística, que impliquen no proceso ás distintas entidades, sectores e colectivos sociais, e afirmou que ?para que estas políticas públicas sexan máis eficaces, deben desenvolverse de xeito planificado e coordinado?, ao través de iniciativas como o Encontro de Política Lingüística. O deputado provincial manifestou o seu desexo de que o encontro teña continuidade e sirva como toma de contacto e posta en común de ideas, proxectos e iniciativas municipais para propiciar a coordinación e creación de rede entre os concellos galegos para a normalización lingüística. Sande invitou á participación aos técnicos e, especialmente, aos alcaldes e responsables políticos destas áreas nos concellos, e afirmou que desde a área que dirixe cursouse xa a correspondente invitación para participar no encontro a todos os concellos da provincia. Pola súa banda, Manuel Vidal, presidente da Coordinadora de Traballadores de Normalización Lingüística (CNTL) destacou o compromiso da Deputación no desenvolvemento e potenciación dos servizos de normalización lingüística municipais, e incidiu na importancia de que estes conten con técnicos cualificados. ?Para implementar os servizos de normalización lingüística, os concellos deben contar cos servizos técnicos correspondentes?, afirmou.