O CGAC celebrará o 15 aniversario cun amplo programa de actividades no verán de 2008

O centro dialogará coa arte dos anos 70 e 80

O Centro Galego de Arte Contemporánea (CGAC) celebrará o vindeiro ano o seu 15 aniversario cun amplo programa de actividades no verán. En xeral, a programación do centro compostelán continuará no 2008 coas liñas trazadas baixo a dirección de Manuel Olveira, que inciden na investigación, nos novos formatos de traballo, na produción, no desenvolvemento a longo prazo e na relación co contexto. Así, o CGAC seguirá o ritmo da actualidade e dialogará coa historia da arte recente, nomeadamente dos anos 70 e 80, segundo informou hoxe nun comunicado. Destacan as exposicións individuais de Guillaume Leblon, Jorge Macchi, Juan Araújo, Waltercio Caldas, Jiri Kovanda e Clemens von Wedemeyer. A elas súmaselles as mostras dedicadas a Susan Philipsz e a Lodeiro, que continuarán abertas nos primeiros meses de 2008. O CGAC comezará o ano coa ollada posta na videocreación galega, coa exposicións 'Ficcións analóxicas. Videocreación galega nos anos 80'. O centro programa outra exposicións temática, titulada 'Situación', unha mostra que recollerá en xullo toda a produción do Proxecto-Edición, que remata o vindeiro ano. O CGAC organizará tamén un ciclo expositivo arredor de fondos propios baixo o título 'Distancia crítica', así como unh selección escultórica na terraza do centro durante o verán. Verán Precisamente a época estival acollerá boa parte da oferta expositiva do CGAC no seu 15 aniversario. Do 10 de abril ao 29 de xuño, estará aberta a mostra do francés Guillaume Leblon, que xogará coa plasticidade dos espazos deseñados por Siza. Entre o 8 de maio e o 13 de xullo, o CGAC acollerá a primeira retrospectiva do arxentino Jorge Macchi, que ten participado nas Bienais da Habana, Porte Alegre, Estambul e Venecia. No mes de xullo, inaugurarase a mostra do venezolano Juan Araújo, que presentará obra vinculada estreitamente ao traballo de Álvaro Siza e ao edificio do CGAC, en forma de minúsculos cadros relacionados con arquitecturas utópicas. O brasileiro Waltercio Caldas converteuse nun dos artistas máis representativos do Brasil dos anos 70 pero é a finais do 2007 cando recibe acollida da crítica española. Ao CGAC chegará en setembro coa produción de obras ex profeso caracterizadas pola economía de materiais e pola elegancia formal. Á volta do verán abriranse as mostras de videocreación de Clemens von Wedemeyer e a de Jiri Kovanda, xa no mes de decembro, coa súa peculiar visión da performance, na súa primeira retrospectiva en España.