UUAA reparte máis de 500 bolsas con produtos do agro para concienciar sobre os abusos nas marxes comerciais

Unións Agrarias repartiu na Coruña de forma gratuita produtos agrogandeiros para concienciar aos consumidores sobre os abusos que se chegan a dar nas marxes comerciais e o alto diferencial que existe en ocasións entre o prezo que lle pagan ó produtor e o prezo que paga o consumidor. O sindicato distribuíu máis de 500 bolsas con carne de porcino e coello, con marxes de máis do 300% na última semana, e de horta, como nabizas ou coliflor. Con este acto, Unións Agrarias pretende tamén chamar a atención do Goberno sobre a necesidade de establecer unha regulación das marxes comerciais a través da Lei de Comercio, de xeito que se impida que os produtores poidan vender por baixo dos custos de produción e se eviten as altas marxes que se dan en ocasións con determinados produtos agrogandeiros, ?con casos de ata o 660% que supoñen que o consumidor paga sete veces máis do que lle pagan ó produtor?, di o sindicato nun comunicado. Unións salienta así mesmo a crise que están a atravesar nos últimos meses as explotacións porcinas e cunícolas polo aumento de custos de produción e a caída dos prezos en orixe ?Nos últimos meses, os produtores de porcino e de coello estiveron a vender os animais por baixo dos custos de produción, en tanto no punto de venda final a carne chegou a acadar marxes de ata o 400% no caso do porcino e de máis do 300% no caso do coello?. O sindicato insta tamén ó goberno a implantar un dobre etiquetado dos produtos agrogandeiros, de xeito que o consumidor poida saber non só o prezo que ten pagar senón tamén o que lle pagaron ao produtor. Unións solicita tamén un impulso á trazabilidade dos produtos agrogandeiros, é dicir que o etiquetado dos mesmos inclúa o lugar de produción e os centros de transformación ou envasado polos que pasou, de ser o caso.