Santiago se prepara para una Semana de Cine Cubano

Unha variada selección de cine cubano poderá verse na capital galega do 12 ao 16 de maio, froito dun acordo asinado en 2007 na Habana entre o Consorcio Audiovisual de Galicia e o Instituto Cubano de Arte e Industria Cinematográfica (ICAIC) para difundir a ambas beiras do Atlántico os patrimonios audiovisuais dos dous países. Do mesmo xeito, desenvolverase en Cuba unha Semana de Cine Galego. Así o anunciou o presidente do Consorcio e secretario xeral de Comunicación da Xunta, Fernando Salgado, quen avanzou que Galicia acollerá en xuño a Semana do Cine Brasileiro e en setembro a Semana do Cine Arxentino, a raíz de protocolos similares. 'El Benny', 'La pared', Tres veces dos', 'Viva Cuba' e 'Nada' son os títulos elixidos para a primeira edición desta mostra bienal. As proxeccións desenvolveranse do luns ao venres da vindeira semana no Teatro Principal de Santiago, a partir das 20 horas, e a entrada será de balde, previa retirada do convite no Teatro a partir das 17 horas. O director do Festival de La Habana, Iván Giraud, salientou a "variedad" e o feito de que se dea a coñecer a nova fornada de autores do cine cubano ao público galego, xa que os filmes incluídos nesta mostra "son todos primera obra, excepto 'Viva Cuba'". Xunto a Salgado e Giroud, asistiron ao acto o presidente da SGAE no Noroeste, Javier Vidal, e o actor cubano Héctor Noas, protagonista de 'La pared', un filme de baixo orzamento que se proxectará estes días en Santiago, así como o músico Santiago Feliú, compositor de bandas sonoras de filmes cubanos e que actuará hoxe a partir das 20 horas no acto de inauguración da Mostra que se desenvolverá na sede compostelá da SGAE. Benny Moré O filme inaugural da Mostra, 'El Benny', dirixida por Jorge Luis Sánchez en 2006, baséase na vida do músico cubano Benny Moré, seleccionada por Cuba como candidata aos Oscar no 2007 e que xa percorreu un número importante de festivais internacionais, nos que apañou algúns premios, como o de Montreal, La Habana, Miami, Cannes e El Cairo. Héctor Noas protagoniza 'La pared', dirixida por Alejandro Gil en 2006, e na que fai dun home que decide illarse da realidade. O filme poderá verse o martes. Ao día seguinte, exhibirase 'Tres veces dos', de Pavel Giroud, Lester Hamlet e Esteban Insausti, unha película composta por tres contos a modo de produción experimental do ano 2004. Dous nenos deciden escapar da súa casa para percorrer a illa. Ese é o argumento de 'Viva Cuba', unha historia de amizade dirixida por Juan Carlos Cremata e estreada no 2005. A Mostra pecharase con 'Nada', de Juan Carlos Cremata, do ano 2001, filme no que Carla Pérez, unha rapaza que traballa en Correos, empeza a implicarse nas cartas dos seus veciños.