Rufus Wainwright pecha o ciclo Sons da Diversidade en Santiago

O ciclo Sons da Diversidade chega ao seu último concerto do primeiro semestre de 2008 co concerto de Rufus Wainwright, que actuará o vindeiro domingo, 1 de xuño, a partir das 21 horas no Auditorio de Galicia, en Santiago. Wainwright é considerado o príncipe actual do pop. Nado en Estados Unidos pero criado en Canadá, Rufus é fillo de dúas figuras do pop estadounidense, Loudon Wainwright III e Kate McGarrige, e irmán da vocalista Marta Wainwright. No 1998 publicou o seu primeiro disco, co que obtivo o Premio ao Mellor Novo Artista do Ano pola revista Rolling Stone. O álbum 'Poses', lanzado no 2001, confirmao como un excepcional cantautor de beleza insuperable e gran sensibilidade. Ironía, ego e exhibicionismo, acompañado da súa condición de icona gay, afortalan o seu status de artista á marxe. Posteriormente, chegaron os traballos 'Want One' e 'Want Two', que inclúen extractos de misas en latín, aromas do Bolero de Ravel, orquestracións paradisíacas e reggae de color rosa. En 2007 edita 'Release The Stars', un espectáculo íntimo, decadentemente agridoce e único. Con este concerto, remata outra xeira de Sons da Diversidade, que contou coa presenza de artistas como Moving Hearts, Ute Lemper, Uxía, Tom Zé e Laurie Anderson. As entradas están á venda na web www.caixagalicia.es, no teléfono 902 434 443 e no Auditorio de Galicia, a un prezo de 20 euros, cun desconto do 50% para estudantes e xubilados.