EN LUGO
Cultura convoca o concurso de ideas para a construcción do Centro de Interpretación e Museo da Romanización
A Consellería de Cultura e Turismo ven de convocar un concurso de ideas para
levar a cabo o Centro de Interpretación e Museo da Romanización de Lugo, centro
da Rede Galega do Patrimonio Arqueolóxico, como publica hoxe o Diario Oficial de
Galicia na súa páxina 842.
A convocatoria seleccionará o anteproxecto de rehabilitación do edificio do
Cuartel de San Fernando en Lugo para albergar este centro, mediante procedemento
aberto, tramitación ordinaria e expediente anticipado de gasto.
Os concursantes, que terán un prazo de 60 días para redactar as súas
propostas, optarán a tres premios e dous accésits, sendo o primeiro premio de
50.000 euros e os accésits de 2.500 cada un. O concurso de ideas permanecerá
aberto ata o 11 de marzo.
A Rede Galega do Patrimonio Arqueolóxico estará conformada por catro centros
de interpretación desde o punto de vista histórico e territorial, que buscan o
equilibrio entre o rural e o urbano. O Parque Arqueolóxico da Arte Rupestre,
situado no concello de Campo Lameiro, o do Megalitismo na Costa da Morte, o de
San Cibrao de Lás en Ourense, e por último, o Centro de Interpretación e Museo
de Romanización de Lugo serán os integrantes deste conxunto.