FESTIVAL MÚSICA
Shooglenifty e Krêposuk, primeiras bandas internacionais confirmadas do Festival Ortigueira 2010
O grupo escocés Shooglenifty e a banda bretoa Kreposuk formarán parte do cartel
artístico do próximo Festival do Mundo Celta. Trátase dos primeiros nomes
internacionais anunciados pola organización do certame folk, liderado polo
Concello de Ortigueira co patrocinio de Xacobeo 2010, Estrella Galicia e
Deputación da Coruña.
O certame musical, declarado de interese turístico internacional e totalmente
de balde, celebrará do 8 ao 11 de xullo a súa XXVI edición. A formación
escocesa, fixa nas quinielas de favoritos dos afeccionados, será o sábado 10 de
xullo un dos pratos fortes da oferta do Escenario Estrella Galicia, cunha
programación que dará cabida, un ano máis, aos mellores grupos mundiais da
música celta.
Shooglenifty, o sexteto liderado polo violinista Agnus Grant, volverá subirse
ao palco ortegano tras sete anos de ausencia. Na súa terceira visita ao
macrofestival, presentará os temas do seu último traballo, un álbum dobre,
editado en 2009 titulado 'Murmichan', co que obtivo novamente o recoñecemento da
crítica especializada.
E festa ao grande promete tamén a presenza no cartel de Krêposuk, unha banda
bretoa que, nos seus doce anos de traxectoria, deixouse ver pouco por España.
Curtidos en máis de douscentos festivais, os de Le Mans debutarán o xoves 8 de
xullo en Galicia coa súa proposta manifestamente rockeira, adscrita ao celta
pola utilización de instrumentos tradicionais como o violín, as frautas ou a
bombarda, e ameazan con converterse na revelación da programación do 2010.