XACOBEO

O Sónar Galicia ofrece na Coruña un cartel con 100 artistas e 42 actividades programadas

O Sónar Galicia ofrecerá na Coruña un cartel con 100 artistas e 42 actividades programadas. O conselleiro de Cultura e Turismo, Roberto Varela, presentou  o Festival Internacional de Música Avanzada e Arte Multimedia Sónar Galicia 2010, asegurando que "non é esaxerado dicir que é un dos festivais máis importantes do mundo, non só no eido específico da música electrónica, senón da música en xeral e con maiúsculas".

Entre o a xornada de mañá e o sábado 19 de xuño, Sónar Galicia presentará un programa no que se inclúen un cento de artistas e 42 actividades, entre as que se atopan vinte concertos, trece sesións, cinco obras no apartado SonarMàtica e catro proxeccións en Sonar Cinema. A programación musical que ofrecerá Sónar Galicia durante as tres xornadas combinará grandes shows de artistas internacionais, con propostas de corte vangardista e proporá unha mirada atenta á escena musical galega.



O festival presenta actuacións de artistas internacionais como Lcd Soundsystem, que ofrecerá o seu primeiro show en España para presentar os seus novos temas. O o grupo Air tamén presentará o seu novo disco. Pola súa banda, Laurent Garnier actuará por primeira vez en Galicia coa súa banda de directo, formada por cinco músicos, e Hot Chip ofrecerá os temas do seu traballo 'One Life Stand'. Tamén estarán Matthew Herbert, Flying Lotus, Alva Noto+Blixa Bargeld, Delorean ou Broadcast. Asemade, haberá sesións do dj Sasha ou de John Talabot, xunto a unha ampla representación de artistas galegos.



No tocante á presencia galega, trátase de 14 artistas que están investigando nos campos da electrónica e do pop avanzado con altas doses de talento e imaxinación. Un exemplo disto é O.M.E.GA, un grupo formado por vinte músicos procedentes de diferentes disciplinas que basea o seu discurso na improvisación xestual e que combina música clásica, electrónica, free-jazz, textos e referencia aos sons do mundo e da música popular.