ESCRITURA

A Semana Auria reunirá en Ourense aos grandes autores da literatura histórica

 Ourense vivirá do 10 ao 17 de outubro a gran cita monográfica dedicada á literatura histórica. Trátase de Auria, unha semana na que se xuntarán autores, profesionais e lectores dun xénero que se atopa entre os máis seguidos. Esta iniciativa está dentro da programación de Xacobeo 2010 e conta co apoio da Consellería de Cultura e Turismo.

Entre os obxectivos principais deste proxecto atópanse divulgar o xénero de literatura histórica e as súas novidades máis importantes para o último trimestre de 2010 e o primeiro semestre de 2011, dar a coñecer ao público aos autores máis prestixiosos e descubrir os novos valores, así como analizar o fenómeno de captación de lectores que xerou o xénero na última década e estableceren debates entre historia e literatura.

Unha gran feira do libro, situada nos xardíns do Posío de Ourense, acollerá a librarías que amosarán e porán á venda os seus volumes. Nesta feira tamén terán lugar presentacións, mesas redondas e diversas actividades de divulgación da lectura.

A nómina de escritores contará coa participación de César Vidal, Xosé Carlos Caneiro, Manolo Rivas, Carlos Reigosa, Juan Eslava Galán ou Luis García Mañá, que estarán amosando os seus libros, xunto a outros moitos que conforman un programa ambicioso e completo.

Porén, a Semana de Literatura Histórica abrirase a máis sedes na cidade. Así, no Centro Cultural da Deputación de Ourense terán lugar diversas actuacións musicais e recitais enmarcados no ciclo Auria Cultural. Auria tamén abrirá os seus ollos ao cine, xa que un ciclo de películas sobre personaxes históricos permitirá achegarse a figuras como Genghis Khan ou El Bosco. Os filmes proxectaranse en versión orixinal subtitulada.