A TVG presentará unha querela contra Mediapro para recuperar os dereitos de emisión do fútbol en aberto

Os telespectadores coñecerán o luns a nova imaxe da canle autonómica

O director da Televisión de Galicia, Xesús Iglesias, anunciou que presentará unha querela contra a compañía Mediapro para recuperar os dereitos de emisión do fútbol de Primeira División. Iglesias expresou a súa "preocupación" pola imposibilidade de seguir emitindo o fútbol nas noites dos sábados, non só pola "audiencia segura" que obtiñan, senón tamén pola "perda social" tras 15 anos vendo o fútbol en galego. Deste xeito, a televisión pública autonómica confía en volver emitir os partidos correspondentes á Liga de Fútbol Profesional (LFP), logo de que a nova canle La Sexta comezase a ofrecer o partido semanal en aberto todos os sábados. Ademais, a TVG presentou en Santiago a súa nova imaxe corporativa, que os telespectadores poderán coñecer a partir do luns, e avanzou a programación para esta nova tempada. 'A Galega', tal como se fai chamar agora a televisión pública autonómica, presenta no seu logotipo un simple 'G'. Segundo sinalou Vicente Gómez, da empresa de deseño Rez, creadora do redeseño e especializada na identidade de cadeas televisivas, esta letra "identifica un país" e resulta un logo "máis innovador", ó que lle augurou "unha longa vida". Pero non só cambia o logo. As cortinillas, a continuidade e todos os elementos gráficos presentarán un aspecto distinto. Os programas informativos gravaranse a partir do luns no plató 300, cunha nova decoración. O Telexornal incorpora a cor vermella e claras referencias á era dixital. Asimesmo, Iglesias incidiu no "lavado de cara" que precisaba o ente co cambio de dirección. A filosofía na que se baseou esta nova imaxe incluía o carácter xeneralista da canle, así como aspectos de modernidade. Aínda que o traballo da renovación da imaxe rematou xa en verán, a cadea agardou a "unha época máis axeitada" para presentar esta novidade. A Radio Galega xa remozara as súas cortinillas e identificadores sonoros en xaneiro, pero para o seu director xerente, Virxilio Costas, o logotipo "necesitaba unha posta ó día" que transmitise unha radio "máis cosmopolita" e o "compromiso co país". Nova programación O primeiro 'reality' da televisión pública galega comezará dentro de dúas ou tres semanas, segundo anunciou Xesús Iglesias. 'A Casa de 1906' se emitirá durante tres días á semana e terá un espazo especial dentro de 'Luar'. Iglesias matizou que este novo programa era "ben distinto" dos que estamos afeitos a ver nas canles privadas, xa que "non é un programa de carnaza". En canto á ficción, a serie americana 'Invasión' terá o seu espazo os xoves á noite, despois de superar a proba do verán. Ademais continuarán series galegas de comprobado éxito, como 'Libro de familia' ou 'A vida por diante', e estrearase unha serie nova, de carácter máis urbano cás anteriores: 'Maridos e mulleres'. O director xerente da TVG declarou tamén que aqueles novos produtos televisivos que obtiveron bos resultados se manterán na nova programación, como o 'Pequeno gran show', probado no verán, 'Cifras e Letras', 'Luar', 'Alalá' ou 'Os Tonechos'. Ademais, a canle autonómica apostou por manter programas de interese público, como 'O Debate', 'Galicia documental' ou 'Ciencia nosa'.