O CDG programa para o Salón Teatro de Santiago a obra de Rubianes "Lorca eran todos", censurada en Madrid

O Centro Dramático Galego (CDG) programa para o Salón Teatro de Santiago a obra 'Lorca eran todos', que foi censurada en Madrid a raíz dunhas declaracións críticas sobre a unidade de España por parte do seu director, o actor galego Pepe Rubianes. Mentres a obra tivo que ser retirada do Teatro Español por ameazas e presións políticas, o CDG, dependente da Consellería de Cultura, programa a polémica obra de Rubianes para os vindeiros días 16 e 17 de decembro no Salón Teatro compostelán. Con pezas coma esta no cartel, o Centro pretende converter o Salón Teatro nun referente na comunidade, cunha programación "continuada, plural e de calidade". Así o anunciaron a directora do CDG, Cristina Domínguez, e a conselleira de Cultura, Anxela Bugallo, na presentación da nova tempada do CDG. Ademais de 'Lorca eran todos'. o Salón Teatro acollerá no último trimestre do ano a exhibición de 'O regreso ao deserto', proxeccións de Cineuropa e a gala final do Certame de Creación Coreográfica de Galicia, así como os espectáculos 'El señor Ibrahim y las flores del Corán', e 'Woyzeck', para dar paso á Semana de Teatro Infantil no Nadal. Dramaturxia contemporánea A dramaturxia contemporánea é a principal aposta do CDG para esta nova etapa, e servirá de gancho para ampliar e fidelizar o seu público. Mostra disto é o cartel que abre a nova tempada, e no que teñen cabida non só as produccións propias, senón tamén as coproducións con compañías privadas. A obra 'O regreso ao deserto', do dramaturgo Bernard-Marie Koltes, estrearase o vindeiro 20 de outubro no Salón Teatro de Santiago, a cargo da directora do CDG, Cristina Domínguez, quen destacou o nome do escritor teatral francés como "destacado na dramaturxia contemporánea". O público familiar poderá asistir á escenificación da peza 'Tarará-chis-pum', creada por Artello Teatro e que se representou por primeira vez en 1978. Trátase dunha versión renovada da primeiro espectáculo profesional de teatro infantil feito en Galicia, cun novo elenco. 'A piragua' será o título da obra que desenvolverá o dramaturgo residente do CDG ata a súa estrea en abril. Cándido Pazó partirá dunha anécdota para presentar o tema da violencia doméstica, que enfiará o resto da narración. No novo cartel da CDG hai lugar para as coproducións con compañías privadas galegas. E o caso do espectáculo 'Kamikaze', no que a compañía PistaCatro contará co apoio do Centro. Coa colaboración con este grupo, especializado no novo circo, o CDG pretende "fornecer estruturas empresariais teatrais" e abrir as portas a "propostas escénicas innovadoras", que dean pé a un "relevo xeracional" da escena galega. Textos O CDG comprométese nesta nova etapa coa escrita de novos textos dramatúrxicos contemporáneos para que o teatro galego "continúe vivo", tal como explicou hoxe a directora do CDG. Cándido Pazó será o encargado de coordinar este ano o Centro de Creación Dramática Contemporánea, no que se fomentará o intercambio de coñecementos e experiencias, así como a investigación arredor de novas linguaxes escénicas. Para Pazó, a función principal deste novo organismo é que "as ideas non fiquen no limbo das boas intencións" e descubrir novos valores da dramaturxia teatral e audiovisual a través dos obradoiros que dirixirá a partir de novembro. Por outra banda, Anxela Bugallo anunciou que a editorial Laiovento colaborará co CDG na publicación dunha nova colección denominada 'Escena Aberta', que recollerá os textos representados pola compañía.