Nace a nova revista bimestral de actualidade galega GPS

A empresa DNA Comunicación crea unha nova revista bimestral de actualidade galega, GPS (Galicia Por Seccións). Este novo magazine de información xeral presenta contidos relacionados expresamente con Galicia integramente en galego. No seu primeiro número, correspondente aos meses de outubro e novembro, poderá lerse un informe sobre a revolución do sistema porturario galego, unha entrevista co ciclista Oscar Pereiro, unha reportaxe sobre o 'tunning' en Galicia e unha entrevista cos artistas Menchu Lamas e Antón Patiño. GPS poderase atopar en bares, quioscos e campus universitarios de toda a comunidade, cunha tirada de 10.000 exemplares nunha primeira fase, que pretende chegar a uns 60.000 lectores. Más de 5.000 bares e os campus galegos distribuirán de xeito gratuíto esta nova publicación, que tamén poderá adquirirse en quioscos por 2 euros.